Pisalema 64 - Xitsonga (Bibele)

Timbabva ti ta khomiwa hi tingana.

Eka mufambisi wa vasimi. Pisalema ya Davhida.

¹ Oho Xikwembu, yingisa rito ra mina, loko ndzi rila! Hlayisa vutomi bya mina eka nala loyi ndzi n'wi chavaka!

² Ndzi sirhelele eka makungu ya lavo biha, Ni ka ntshungu lowu baka pongo, lowu tirhaka leswo biha.

³ Va lota tindzimi ta vona kukotisa banga; Va hoxa marito ya ku bava kukotisa miseve,

⁴ Va tilunghisa exihundleni ku hoxela munhu la nga riki na nandzu; Kan'we va n'wi hoxela, va nga chavi nchumu;

⁵ Va titiyisa emhakeni ya vona leyo biha; Va endla makungu ku fihla mitlhamu, Va ku: “I mani la nga ta swi vona?”

⁶ Va anakanya vumbabva, va tilunghisile, makungu ma herile! Mianakanyo ya munhu ni mbilu ya yena swi entile ngopfu.

⁷ Kambe Xikwembu xi va copa hi miseve ya xona: Vonani, va tlhaviwa kan'we;

⁸ Tindzimi ta vona ti va wisa ehansi, Hinkwavo lava va vonaka va ninginisa tinhloko.

⁹ Vanhu hinkwavo va khomiwa hi ku chava, Va vula mitirho ya Xikwembu, va anakanya leswi xi swi endleke,

¹⁰ Lowo lulama u titsakela eka Yehovha, a chavela eka yena, Kutani hinkwavo lava nga ni timbilu to lulama, va tidzunisa.