Pisalema 57 - Xitsonga (Bibele)

Endzhutini wa timpapa ta Xikwembu.

Eka mufambisi wa vasimi. “U nga herisi.” Risimu ra Davhida, ra siku a nga tsutsuma a chava Sawulo, a nghena ebakweni.

¹ Ndzi twele vusiwana, Xikwembu, ndzi twele vusiwana! Hikuva moya wanga wu chavele eka wena; Ndzi chavele endzhutini wa timpapa ta wena; Ku fika nkarhi lowu makhombo ma nga ta va ma hundzile.

² Ndzi huwelela eka Xikwembu lexi nge henhlahenhla, Eka Xikwembu lexi tirhaka hikwalaho ka mina.

³ Xi ta ndzi rhumela ku pfuna hi le tilweni, xi ndzi hlayisa, Hambi ku sola loyi a lavaka ku ndzi mita. Xikwembu xi ta rhumela tintswalo ta xona ni vunene bya xona.

⁴ Moya wa mina wu le xikarhi ka tinghala; Ndzi etlele exikarhi ka valala lava hlantaka ndzilo, Exikarhi ka vanhu lava meno ya vona ma nga matlhari ni miseve, Lava tindzimi ta vona ma nga mabanga layo kariha.

⁵ Oho Xikwembu, titlakuse ehenhla ka matilo! Ku kwetsima ka wena a ku ve ehenhla ka misava hinkwayo!

⁶ A va rhiyile ntlhamu ehansi ka mikondzo ya mina, Moya wa mina a wu korhamile; A va cerile rindzi emahlweni ka mina: Ku wele vona eka rona.

⁷ Mbilu ya mina yi tiyile, oho Xikwembu! Mbilu ya nga yi tiyile; Ndzi ta yimbelela tinsimu ta ku vonga.

⁸ Pfuka moya wanga; pfukani n'wina gubu ni haripa! Ndzi ta pfuxa vurhonga bya mixo.

⁹ Ndzi ta ku twarisa exikarhi ka tinxaka ta vanhu, we Hosi! Ndzi ta ku yimbelela exikarhi ka matiko.

¹⁰ Hikuva tintswalo ta wena ti kurile ti ya fika ematilweni, Ni ku tshembeka ka wena emapapeni.

¹¹ Oho Xikwembu! Titlakuse henhla ka matilo! Ku kwetsima ka wena a ku ve ehenhla ka misava hinkwayo.