Pisalema 54 - Xitsonga (Bibele)

Davhida ni va le Zifi.

Eka mufambisi wa vasimi. Hi magubu. Risimu ra Davhida. Siku va le Zifi va nga ya eka Sawulo, va ku: “Xana Davhida a nga tumbelanga exikarhi ka hina-ke?”

¹ Oho Xikwembu! Ndzi hlayise hi vito ra wena, Ndzi avanyisele hi matimba ya wena!

² Oho Xikwembu! Yingisa xikhongelo xa mina, Rhiya ndleve eka marito ya nomu wa mina!

³ Hikuva va tiko rin'wana va ndzi pfukele matimba, Vanhu lava levaka va lava vutomi bya mina; A va vekangi Xikwembu emahlweni ka vona.

⁴ Vonani, Xikwembu i mupfuni wa nga, Hosi yi le xikarhi ka lava seketelaka moya wa mina.

⁵ Yi ta tlherisela lava ndzi vengaka ku biha. U va heta hi vutshembeki bya wena,

⁶ Ndzi ta ku humesela magandzelo hi ku rhandza ka mina; Ndzi ta twarisa vito ra wena, Yehovha, hikuva ri nene,

⁷ Hikuva ri ndzi tshunxile emahlomulweni ya mina hinkwawo; Kutani mahlo ya mina ma tsaka hi ku vona valala va mina.