Pisalema 51 - Xitsonga (Bibele)

Xikhongelo xa ku tisola.

Eka mufambisi wa vasimi. Pisalema ya Davhida. Ya siku leri Natani, muprofeta, a nga ta eka yena, loko Davhida a ye eka Batixeba.

¹ Oho Xikwembu! Ndzi twele vusiwana hi tintswalo ta wena; Hi musa lowukulu wa wena, hlangula swidyoho swa mina.

² Ndzi hlantswe kunene, u susa ku homboloka ka mina, U ndzi basisa hi ku susa swivi swa mina,

³ Hikuva ndzi tivisisa xidyoho xa mina, Ni xivi xa mina xi le mahlweni ka mina hi masiku hinkwawo.

⁴ Ndzi dyohele wena, wena ntsena; Ndzi endlile leswo biha emahlweni ka wena, Hi laha u nga ta va la lulameke loko u vulavula, Ni loyi a tengeke loko u avanyisa.

⁵ Waswivo, ndzi tswariwile eku dyoheni, Mana wa mina u ndzi velekile eswivini.

⁶ Kambe, u rhandza leswinene embilwini ya munhu, Ndzi dyondzise vutlhari exihundleni xa moya wa mina!

⁷ Ndzi basise hi hisopa, hi kona ndzi nga ta tenga; Ndzi hlantswe kutani ndzi ta basa ku tlula gamboko.

⁸ Ndzi byele ku khana ni ku tsaka, Kutani marhambu lawa u ma tshoveke ma ta pfuka hi ku tsaka.

⁹ Tshika ku languta swidyoho swa mina, U hlangula ku homboloka ka mina hinkwako.

¹⁰ Oho Xikwembu! Vumba endzeni ka mina mbilu leyo tenga. U tlhela u pfuxa endzeni ka mina moya lowo tiya.

¹¹ U nga ndzi cukumeti ekule ni mombo wa wena, U nga ndzi tekeli moya wa wena lowo kwetsima.

¹² Ndzi tlherisele ku tsaka ka ku hlayiseka ka wena, Ndzi va ndzi seketeriwa hi moya lowu lulameke!

¹³ Ndzi ta dyondzisa vadyohi tindlela ta wena, Kutani vendlaswivi va ta vuyela eka wena.

¹⁴ Oho Xikwembu, Xikwembu xa ku hlayiseka ka mina! Ndzi kutsule ka ngati leyi halatiweke, Kutani ririmi ra mina ri ta twarisa ku lulama ka wena.

¹⁵ Hosi, pfula milomu ya mina, Kutani nomu wa mina wu ta vula xidzumo xa wena.

¹⁶ Hikuva a ku tsakeli magandzelo, ingi ndzi ku humesele wona; Kambe a ku tsakeri tiholokosta.

¹⁷ Magandzelo ya Xikwembu i moya lowu tshovekeke; Oho Xikwembu! A ku soli mbilu leyi tshovekeke, leyi nga enhlomulweni.

¹⁸ Katekisa Siyoni hi nsovo wa wena, Akisa rirhangu ra Yerusalema!

¹⁹ Hi kona u nga ta tsakela magandzelo ya ku lulama, Ni tiholokosta, ni timhamba leti u humeseriwaka swirho hinkwaswo swa tona; Hi kona va nga ta humesa tinkunzi ealitarini ya wena.