Pisalema 5 - Xitsonga (Bibele)

Ku khongela Yehovha ku lweriwa eka vadyohi.

Eka mufambisi wa vasimi. Hi tinanga. Pisalema ya Davhida.

¹ Oho Yehovha! Rhiya ndleve eka marito ya mina! U yingisa ku anakanya ka mbilu ya mina!

² Yingisa rito ra mina loko ndzi huwelela, wena hosi yanga, ni Xikwembu xanga! Hikuva ndza ku khongela.

³ Yehovha, u yingisa rito ra mina ka ha ri mixo; Wa ha ri mixo, ndzi hundzuka eka wena, ndzi languta.

⁴ Hikuva a ku Xikwembu lexi tsakelaka ku biha; Lowo biha a nga ka a nga aki na wena.

⁵ Lavo hunguka va nga ka va nga yimi emahlweni ka wena; U venga vadyohi hinkwavo.

⁶ U herisa lava vulavulaka hi vunwa; Vanhu va ngati ni lava xisaka, va sandzeka eka Yehovha.

⁷ Kambe mina hi tintswalo ta wena letikulu ndzi ta nghena endlwini ya wena, Ndzi ta khinsama hi ku chava etempeleni ya wena leyo kwetsima.

⁸ Yehovha, ndzi fambise eku lulameni ka wena hikwalaho ka lava lwaka na mina. U lunghisa ndlela ya mina emahlweni ka mina.

⁹ Hikuva a ku na ku tshembeka emilon'wini ya vona; Timbilu ta vona ti tele vumbabva, Mikolo ya vona i masirha lama ahlameke, Tindzimi ta vona ti ni marito ya ku kanganyisa.

¹⁰ U va ba, Xikwembu, u va wisa hi makungu ya vona. U va wisa hikwalaho ka swidyoho swa vona leswi teleke; Hikuva va ku hundzukele.

¹¹ Kutani hinkwavo lava ku tshembaka va ta tsaka; Va ta tsakisisa hilaha ku nga heriki, kutani u ta va lwela. Lava rhandzaka vito ra wena va ta ku tsakela.

¹² Hikuva, wena Yehovha, u katekisa la lulameke, Hi tintswalo ta wena u n'wi rhendzela swanga hi xitlhangu.