Pisalema 49 - Xitsonga (Bibele)

Vuhava bya rifuwo ra misava.

Eka mufambisi wa vasimi. Ya vana va Kore. Pisalema.

¹ Yingisani timhaka leti, n'wina, matiko hinkwawo, Rhiyani tindleve, n'wina vaaki hinkwavo va misava;

² Lavatsongo ni lavakulu, vafuwi ni swisiwana!

³ Nomu wa mina wu ta vula marito ya vutlhari, Mianakanyo ya mbilu ya mina yi ta tala hi ku twisisa.

⁴ Ndzi ta rhiyela rito ra vutlhari ndleve, Ndzi ta hlamusela xifaniso xa mina ndzi va ndzi yimba haripa.

⁵ Xana ndzi ta chavela yini emasikwini ya khombo, Loko ndzi rhendzeriwa hi ku homboloka ka valala va mina?

⁶ Va tshemba rifuwo ra vona, Va tidzunisa hi vukulu bya ku fuwa ka vona.

⁷ Munhu a nga swi koti ku kutsula makwavo, Hambi ku ri ku humesela Xikwembu ntsengo wa yena.

⁸ Ntsengo wa moya wa vona wu dura ngopfu; Munhu a nge wu humesi ni siku ni rin'we;

⁹ Va nga ka va nga hanyi hi masiku lama nga heriki, Leswaku va nga voni sirha;

¹⁰ Kambe va ta ri vona: lavo tlhariha va fa, Na swona swihunguki ni swiphukuphuku swi fa na swona, Va siyela van'wana rifuwo ra vona.

¹¹ Va ringanisa leswaku tindlu ta vona ti ta va kona hi masiku, Ni vuako bya vona etinxakeni ta tinxaka, Va tshula matiko hi mavito ya vona.

¹² Hambiswiritano, munhu la nga eku vonakaleni a nga tiyi, U fana ni swiharhi leswi faka.

¹³ Hi yona ndlela ya vona ni vuhunguki bya vona, Ni lava va landzaka va tsakela marito ya vona.

¹⁴ Va nghenisiwa exivandleni xa lava feke kukota ntlhambi, Va dyiwa hi rifu, Ni mixo, lava lulameke va va kandziyela hi milenge; Vumbhurhi bya vona byi dyiwa hi sirha byi pfumala vutshamo.

¹⁵ Kambe Xikwembu xi ta kutsula moya wa mina exivandleni xa vafi, Hikuva xi ta ndzi tekela eka xona.

¹⁶ U nga chavi loko munhu a andzisa rifuwo ra yena, Loko ku kwetsima ka yindlu ya yena ku engeteleka;

¹⁷ Hikuva siku a nga ta fa, a nga ka a nga teki nchumu wa swona, Ku kwetsima ka yena ku nga ka ku nga xikeli endzhaku ka yena.

¹⁸ Hambi a khensa moya wa yena eku hanyeni ka yena, Hambi vanhu va ku khensa hikwalaho ka ku titsakisa ka wena,

¹⁹ Hambiswiritano, u ta xikela erixakeni ra vatata wa wena, Lava nga ha tiki vona ku vonakala ni siku ni rin'we.

²⁰ Munhu la nga eku vonakaleni, kambe a nga ri na ku twisisa, U fana ni swiharhi leswi faka.