Pisalema 44 - Xitsonga (Bibele)

Khale ni sweswi.

Eka mufambisi wa vasimi. Ya vana va Kore. Risimu.

¹ Oho Xikwembu, hi swi twile hi tindleve ta hina, Vatata wa hina va hi byerile Mitirho leyi u yi endleke emasikwini ya vona, Emasikwini ya khale.

² Hi voko ra wena u hlongorise vamatiko ku va akisa, U herise vamatiko ku va anamisa.

³ Hikuva a va tekangi tiko hi tlhari ra vona, A hi voko ra vona leri nga va ponisa; Kambe i voko ra wena ra xinene, i voko ra wena ni ku vonakala ka wena, Hikuva u va rhandzile.

⁴ Oho Xikwembu! U hosi ya mina: Lerisa ku ponisa ka Yakobo!

⁵ Ha wena hi ta himetela lava nga valala va hina; Hi vito ra wena, hi ta kandziyela lava hi pfukaka.

⁶ Hikuva a ndzi tshembi vurha bya mina, Ni tlhari ra mina ri nga ka ri nga ndzi ponisi;

⁷ Hikuva hi wena la hi ponisaka eka valala va hina, La khomisaka lava hi vengaka tingana,

⁸ Hi ta dzunisa Xikwembu hi masiku hinkwawo, Hi twarisa vito ra wena hi laha ku nga heriki.

⁹ Hambiswiritano u hi cukumetile, u hi funengete hi tingana, U tshikile ku huma ni tinyimpi ta hina;

¹⁰ U hi tlherisele ndzhaku emahlweni ka valala va hina, Kutani lava hi vengaka va hi phanga.

¹¹ U hi nyiketile kukotisa tinyimpfu leti dyiwaka, U hi hangalasile xikarhi ka vamatiko.

¹² U xavisele swahava tiko ra wena, U ri xavisele lexi nga riki xa nkoka.

¹³ U endle ha hina xilo xa ku soriwa eka lava akeke na hina, Hi vungunyiwa ni ku hlekiwa hi lava hi rhendzelaka exikarhi;

¹⁴ U hi endle xivuriso xa ku hleka exikarhi ka vamatiko; Ni vanhu va hi nikinisela tinhloko.

¹⁵ Tingana ta mina ti le mahlweni ka mina hi masiku, Ni ku kanakana ku funengete mombo wa mina,

¹⁶ Loko ndzi twa rito ra la ndzi rhukanaka a va a ndzi sandza, Loko ndzi vona nala ni loyi a tirihiselaka.

¹⁷ Leswi hinkwaswo swi hi humelele hambi hi nga ku rivalanga, Hambi hi nga tshikanga ntwanano wa wena,

¹⁸ Timbilu ta hina a ti ku fularhelanga, Ni mikondzo ya hina a yi hambukanga ndlela ya wena.

¹⁹ Leswaku u hi phyandlasa endhawini ya timhisi, U va u hi funengeta hi ndzhuti wa rifu.

²⁰ Loko ngi hi rivele vito ra Xikwembu xa hina, Hi tshambulutele swikwembu swimbe mavoko ya hina,

²¹ Xana Xikwembu ingi xi nga swi tivanga, Leswi xi tivaka leswi fihliweke etimbilwini xana?

²² Kambe hi dlayiwa hi masiku hinkwawo hikwalaho ka wena, Hi ringanisiwa ni tinyimpfu leti yisiwaka eku tlhaviweni.

²³ Pfuka! U etlelela yini, Hosi? Pfuka! U nga hi cukumeteli makumu!

²⁴ U hi fihlela yini mombo wa wena? U rivele ha yini khombo ra hina ni maxangu ya hina?

²⁵ Hikuva mimoya ya hina yi khunarhele entshurini, Miri ya hina yi namarhele misava.

²⁶ Pfuka, u ta hi pfuna! Hi kutsule hikwalaho ka vunene bya wena!