Pisalema 41 - Xitsonga (Bibele)

Xikhongelo xa loyi a rhendzeriweke exikarhi hi lava n'wi vengaka.

Eka mufambisi wa vasimi. Pisalema ya Davhida.

¹ Ku katekile loyi a anakanyaka xisiwana, Hi siku ra khombo, Yehovha u ta n'wi lwela.

² Yehovha u ta n'wi hlayisa, a va a n'wi hanyisa; U ta katekisiwa emisaveni, Kutani u nga ka u nga n'wi nyiketi eku naveleni ka valala va yena.

³ Yehovha u ta n'wi tiyisa emasangwini loko a vabya; Wa hundzuluxa swinene byetlelo bya yena loko a vabya.

⁴ Mina, a ndzi ku: “Yehovha! U ndzi twela vusiwana! Horisa moya wanga, hikuva ndzi ku dyoherile.”

⁵ Valala va mina va ndzi vula hi mona, va ku: “U ta fa rini xana? Vito ra yena ri ta lova rini?”

⁶ Ni loko un'wana a ta ku ndzi vona, a vulavula hi ku hemba, Mbilu ya yena yi n'wi hlengeletela mianakanyo ya ku biha; A huma, kutani a vulavula ehandle.

⁷ Lava ndzi vengaka hinkwavo va hlevetelana ha mina; Va ndzi anakanyela swo biha, va ku:

⁸ “Vuvabyi lebyikulu byi le ka yena. Leswi a etleleke, a nga ka a nga engeti ku pfuka.”

⁹ Na yena nakulorhi loyi ndzi n'wi tshembeke, Loyi a nga dya vuswa bya mina, u ndzi tlakusele xirhendze.

¹⁰ Kambe wena Yehovha, ndzi twele vusiwana, u ndzi pfuxa, Ndzi ta va tlherisela leswi va lulamelaka.

¹¹ Hi laha ndzi nga ta tiva leswaku wa ndzi rhandza, Loko nala wa mina a nga ti dzunisi ha mina.

¹² Kambe wa ndzi tiyisa eku tengeni ka mina, Kutani wa ndzi veka emahlweni ka wena hi masiku.

¹³ A ku vongiwe Yehovha, Xikwembu xa Israele, Hi mikarhi leyi nga riki na ku sungula ni ku hela. Amen! Amen!