Pisalema 37 - Xitsonga (Bibele)

Lavo lulama va ta katekisiwa ni la emisaveni.

Ya Davhida.

¹ U nga tshuki u karihela lavo homboloka, U nga tshuki u navela lava endlaka leswo biha.

² Hikuva va ta tsemiwa sweswi kukotisa byanyi, Va ta vuna kukotisa rihlaza.

³ Tshemba Yehovha, u endla leswo lulama, U aka etikweni, u xurha vunene.

⁴ Tsakela Yehovha, Kutani u ta ku nyika leswi naveriwaka hi mbilu ya wena.

⁵ Tshikela Yehovha ndlela ya wena, u n'wi tshemba, Kutani yena u ta tirha.

⁶ U ta humesa ku lulama ka wena kukota ku vonakala, Ni ku tenga ka wena kukotisa nhlekanhi.

⁷ Miyela emahlweni ka Yehovha, u langutela yena; U nga kariheli munhu la katekeke endleleni ya yena, La hetisaka makungu layo biha ya yena.

⁸ Tshika ku kariha, u fularhela ku leva; U nga hlundzuki, swi nga ku dyohisa ntsena,

⁹ Hikuva lavo biha va ta susiwa, Kambe lava tshembaka Yehovha va ta fuma misava.

¹⁰ Ku sele nkarhinyana, kutani lowo biha a nga ka a nga ha vi kona; U ta lavisisa xivandla xa yena, kutani u ta va a nga ha ri kona.

¹¹ Va musa va ta fuma misava, Va ta titsakela eku rhuleni lokukulu ka vona.

¹² Lowo biha u kanelela lowo lulama swo biha, U n'wi getselela meno.

¹³ Kambe hosi ya n'wi hleka, Hikuva yi vona leswaku siku ra yena ri kusuhi.

¹⁴ Lavo homboloka va hlomula tlhari, va konga vurha, Ku wisa ehansi la nga enhlomulweni ni xisiwana, Ni ku dlaya lava fambaka hi ndlela ya ku lulama.

¹⁵ Matlhari ya vona ma ta tlhava timbilu ta vona; Mavurha ya vona ma ta tshoveka.

¹⁶ Lexitsongo xa la lulameke Xi tlula ndzalo ya lavo homboloka va ku tala.

¹⁷ Hikuva mavoko ya lavo homboloka ma ta tshoveka, Kambe Yehovha u tiyisa lava lulameke.

¹⁸ Yehovha u tiva masiku ya vanhu vo lulama, Ndzhaka ya vona yi ta sala hi masiku.

¹⁹ Va nga ka va nga vi na tingana enkarhini wa mahlomulo, Kambe va ta xurha emasikwini ya ndlala.

²⁰ Hikuva lavo homboloka va ta lova, Ni lava vengaka Yehovha va ta hela kukotisa rihlaza, Va ta tlhaka kukotisa musi.

²¹ Lowo biha wa lomba, kambe a nga tlherisi; La lulameke u twela vanhu vusiwana, wa hanana.

²² Hikuva lava Xikwembu xi va katekisaka, va ta dya ndzhaka ya misava; Kambe lava xi va rhuketelaka, va ta susiwa.

²³ Yehovha u tiyisa mikondzo ya munhu lonene, Kutani u tsakisiwa hi ndlela ya yena.

²⁴ Loko a khunguvanyeka, a nga ka a nga weri makumu, Hikuva Yehovha u n'wi khomile hi voko.

²⁵ A ndzi ri lontshwa, kutani ndzi dyuharile, Kambe a ndzi vonanga la lulameke a tshikiwa, Ni vana va yena va kombele vuswa bya vona.

²⁶ U ni tintswalo hi masiku hinkwawo a va a lomba, Kutani vatukulu va yena va katekile.

²⁷ Fularhela swo biha, u endla leswinene, Kutani u ta tshama hi laha ku nga heriki.

²⁸ Hikuva Yehovha u rhandza ku lulama, A nga ka a nga tshiki lava n'wi rhandzaka, Va hlayisiwa hi masiku. Kambe vana va lavo biha va ta herisiwa.

²⁹ Lavo lulama va ta fuma misava, Va ta tshama ka yona hi masiku.

³⁰ Nomu wa la lulameke wu humesa vutlhari, Ririmi ra yena ri vula leswo lulama.

³¹ Nawu wa Xikwembu xa yena wu le mbilwini ya yena; Mikondzo ya yena a yi tsekatseki.

³² Lowo biha u rindza la lulameke, U lava ku n'wi dlaya;

³³ Kambe Yehovha a nga ka a nga n'wi tshiki emavokweni ya yena, A nga ka a nga n'wi wisi loko a ta avanyisiwa.

³⁴ Tshemba Yehovha, u hlayisa ndlela ya yena, U ta ku kurisa leswaku u fuma misava; Kambe u ta vona ku herisiwa ka lavo biha.

³⁵ Ndzi vonile lowo biha la chavisaka, A nava kukotisa murhi lowu hlukeke ngopfu;

³⁶ Kambe u hundzile, kutani, vonani, a nga ha ri kona, Ndzi n'wi lavile, kambe a ndzi n'wi kumanga.

³⁷ Xiya la tengeke, u languta la lulameke; Hikuva munhu wa ku rhula u ni vatukulu;

³⁸ Kambe valandzuri va ta hela hinkwavo, Rixaka ra lavo biha ri ta herisiwa.

³⁹ Ku hlayiseka ka lavo lulama ku huma eka Yehovha! I khokholo ra vona enkarhini wa mahlomulo.

⁴⁰ Yehovha wa va pfuna, wa va kutsula; U va kutsula eka lavo biha, wa va hlayisa, Hikuva va chaverile eka yena.