Pisalema 33 - Xitsonga (Bibele)

Ku tsakela Yehovha ni ku tshemba yena.

¹ Tsakelani Yehovha, n'wina lava lulameke! Ku vonga ku fanele vanhu va ku lulama.

² Twarisani Yehovha hi haripa, N'wi yimbeleleni hi timbila ta khume ra tingoti.

³ Yimbelelani yena risimu lerintshwa! Mi pfumisa timbila ni marito ya n'wina!

⁴ Hikuva rito ra Yehovha ri lulamile, Ni mitirho hinkwayo ya yena yi tshembekile;

⁵ U rhandza ku lulama ni ku tenga; Misava yi tele hi vunene bya Yehovha.

⁶ Matilo ma endliwile hi rito ra Yehovha, Ni vandla hinkwaro ra wona hi ku hefemula ka nomu wa yena.

⁷ A hlengeleta mati ya lwandle ma endla nhulu, A veka swidziva evuhlayiselweni.

⁸ Misava hinkwayo a yi chave Yehovha! Vaaki hinkwavo va misava a va rhurhumele emahlweni ka yena!

⁹ Hikuva wa vula, kutani xilo xi kona; Wa lerisa, kutani swi humelela.

¹⁰ Yehovha u onha makungu ya vamatiko; Wa endla mianakanyo ya matiko swahava.

¹¹ Makungu ya Yehovha ma tiyile hi laha ku nga heriki; Mianakanyo ya mbilu ya yena yi yima etinxakeni hinkwato.

¹² Ku katekile tiko leri Yehovha a nga Xikwembu xa rona! Ni vanhu lava a tihlawuleleke ku va ndzhaka ya vona!

¹³ Yehovha u languta a ri ematilweni, U vona vana hinkwavo va vanhu.

¹⁴ Endhawini leyi a akeke eka yona, U languta vaaki hinkwavo va misava;

¹⁵ Hi yena la vumbeke timbilu ta vona hinkwavo, La anakanyaka ku endla hinkwako ka vona.

¹⁶ Hosi a yi ponisiwi hi nyimpi leyikulu, Nhenha a yi tshunxiwi hi matimba lamakulu

¹⁷ Hanci ya hluleka ku ponisa, Munhu a nga hlayisiwi hi matimba hinkwawo ya yona.

¹⁸ Vonani, mahlo ya Yehovha ma le henhla ka lava n'wi chavaka, Ehenhla ka lava tshembaka vunene bya yena,

¹⁹ Ku tshunxa mimoya ya vona eku feni, Ni ku va hanyisa enkarhini wa ndlala.

²⁰ Mimoya ya hina yi titshembele Yehovha; U mupfuni wa hina ni switlhangu swa hina.

²¹ Hikuva timbilu ta hina ti n'wi tsakerile, Hikuva hi tshembile vito ra yena lero kwetsima.

²² Oho Yehovha! Tintswalo ta wena a ti ve ehenhla ka hina, Kukotisa leswi hi ku languteleke!