Pisalema 32 - Xitsonga (Bibele)

Ku tsaka ka loyi a rivaleriweke swidyoho swa yena.

Ya Davhida. Risimu.

¹ Ku katekile munhu loyi ku rivaleriweke ku dyoha ka yena, Loyi swidyoho swa yena swi funengetiweke!

² Ku katekile munhu loyi Yehovha a nga n'wi hlayeriki ku biha ka yena, Loyi ku nga riki na mano embilwini ya yena!

³ Loko ndzi miyerile, marhambu ya mina a ma gudlagudla, Hi ku konya ka mina hi siku hinkwaro.

⁴ Hikuva nhlekanhi ni vusiku voko ra wena ri tshama ri ndzi tikela, Matimba ya mina ma hundzuka ku oma ka ximumu.

⁵ Ndzi ku tivisile xidyoho xa nga, A ndzi fihlanga ku homboloka ka nga; Ndzi te: “Ndzi ta tivula ka Yehovha ku dyoha ka mina,” Kutani u hlangurile nandzu wa xidyoho xanga.

⁶ Hikwalaho, un'wana ni un'wana la ku rhandzaka U ta ku khongela hi nkarhi lowu u kumiwaka ha wona; Hambi mati lamakulu loko ma hundza, ma nga ka ma nga n'wi fikeri.

⁷ U xichavelo xa mina; u ndzi sivelela maxangu; U ta ndzi rhendzela hi tinsimu ta ku hlayiseka.

⁸ Ndzi ta ku tlharihisa ndzi ku komba ndlela leyi u faneleke ku famba ha yona; Ndzi ta ku letela, ni mahlo ya mina ma ta va eka wena.

⁹ Mi nga tshuki mi fana ni hanci kumbe mbhongolo leyi nga riki na ku twisisa; Swi fanele ku khomiwa enon'wini hi matomu, Loko swi nga ri tano, swi nga ka swi nga ku tshineleri.

¹⁰ Mahlomulo layo tala ma tela lowo biha, Kambe la tshembaka Yehovha u ta rhendzeriwa hi tintswalo.

¹¹ Titsakeleni ha Yehovha, mi va mi tsakisisa, n'wina va ku lulama! Yimbelelani hi ku tsaka, n'wina hinkwenu va timbilu to lulama!