Pisalema 22 - Xitsonga (Bibele)

Eli, Eli, lama sabaktani.

Eka mufambisi wa vasimi. Hi “ntshembe ya mixo.” Pisalema ya Davhida.

¹ Xikwembu xanga! Xikwembu xanga! U ndzi tshikele yini? U yimela yini hitlhelo leswaku u nga ti ndzi hlayisa, U nga ti ndzi yingisa loko ndzi huwelela?

² Xikwembu xanga, ndzi vitana ninhlekanhi, kambe a ku hlamari; Nivusiku, kambe a ndzi voni ku wisa.

³ Hambiswiritano, u Mukwetsimi, U tshama exikarhi ka ku dzunisa ka Israele.

⁴ Vatata wa hina va vekile eka wena ku tshemba ka vona; Va ku tshembile kutani u va tshunxile.

⁵ Va huwelele eka wena, kutani va ponisiwile; Va titshembele wena, kutani a va khomiwanga hi tingana.

⁶ Kambe mina ndzi xivungu, a ndzi munhu; Ndzi xisolo eka vanhu, ni la cukumetiweke hi tiko.

⁷ Ndzi xisandzu eka hinkwavo lava ndzi vonaka; Va ahlamisa milomu, va ndzi ninginisela tinhloko,

⁸ Va ku: “U titshembele Yehovha! A a n'wi tshunxe-ke! A a n'wi ponise loko a n'wi tsakela.”

⁹ Kunene u ndzi humesile ekhwirini ra manana, U ndzi wisisile hi ku rhula emaveleni ya yena.

¹⁰ A ndzi ri emavokweni ya wena mpfhuka ndzi tswariwa; Loko ndza ha ri ekhwirini ra manana, u ri Xikwembu xa mina.

¹¹ U nga tshuki u va ekule na mina loko mahlomulo ma ri ekusuhi, Loko ndzi nga ri na loyi a ndzi pfunaka!

¹² Ndzi rhendzeriwe exikarhi hi tinkunzi to tala; Tinkunzi ta Baxani, leta matimba, ti ndzi rhendzele;

¹³ Ti ahlamisa milomu ya tona eka mina, Kukotisa nghala leyi handzulaka leyi mpfandzaka.

¹⁴ Ndzi khuluka kukotisa mati, Marhambu ya mina hinkwawo ma sulekile; Mbilu ya mina yi fana ni xihlenge xa tinyoxi, Yi nyukile emarhumbyini ya mina.

¹⁵ Matimba ya mina ma omile tani hi mbita ya vumba, Ririmi ra mina ri namarherile emalakeni ya mina; Kutani u ndzi latile entshurini wa rifu.

¹⁶ Hikuva timbyana ti ndzi rhendzele; Vandla ra lavo biha ri ndzi rhendzele; Va tlhavile swandla swa mina ni mikondzo ya mina.

¹⁷ Ndzi nga hlaya marhambu ya mina hinkwawo. Vona va ndzi langutisa va khorwisa mahlo ya vona ha mina;

¹⁸ Va avelana tinguvu ta mina, Va hlahluva nguvu ya mina.

¹⁹ Kambe wena Yehovha, u nga yimi ekule na mina! Wena u nga matimba ya mina, hatlisa ku ta ndzi pfuna.

²⁰ U lwela vutomi bya mina etlharini, Ni moya wa mina emin'waleni ya timbyana.

²¹ U ndzi ponisa enon'wini wa nghala, Kambe u ndzi lwela etimhondzweni ta tinyarhi!

²² Ndzi ta vula vito ra wena eka vamakwerhu; Ndzi ta ku twarisa exikarhi ka nhlengeletano.

²³ “N'wina lava chavaka Yehovha, n'wi vongeni! N'wina hinkwenu rixaka ra Yakobo, n'wi twariseni! Rhurhumelani emahlweni ka yena n'wina rixaka hinkwaro ra Israele!

²⁴ Hikuva a nga solanga ni ku nyenya la nga enhlomulweni, A nga n'wi fihlelangi mombo wa yena; Kambe u n'wi yingisile loko a huwelele eka yena.”

²⁵ U ta khensiwa hi mina enhlengeletanweni leyikulu: Ndzi ta ku rihela ku hlambanya ka mina emahlweni ka lava ku chavaka.

²⁶ Lava nga ekhombyeni va ta dya va xurha; Lava lavaka Yehovha va ta yimbelela tinsimu ta yena; Timbilu ta n'wina ti ta hanya hi laha ku nga heriki.

²⁷ Matlhelo hinkwawo ya misava ma ta tsundzuka Yehovha, ma hundzulukela ka yena. Ni tinxaka hinkwato ta matiko ti ta khinsama emahlweni ka yena.

²⁸ Hikuva ku fuma i ka Yehovha; Kambe hi yena la fumaka matiko.

²⁹ Hinkwavo vafuwi va misava va ta dya, va khinsama, Hinkwavo lava xikelaka entshurini va ta korhama emahlweni ka yena, Lava hlulekaka ku hlayisa vutomi bya vona.

³⁰ Vatukulu, va ta n'wi tirhela, Rixaka leri nga ta ta ri ta byeriwa ku kwetsima ka Hosi.

³¹ Loko ri ta, ri ta vula ku lulama ka yena; Ri ta tivisa tiko leri nga ta tswariwa mitirho ya yena.