Pisalema 2 - Xitsonga (Bibele)

Ku averiwa ni ku fuma ka Mesiya.

¹ Xana matiko ma dzumadzumela yini? Ni vamatiko va anakanyela yini swahava xana?

² Xana tihosi ta misava ti pfukele yini, Ni tihosana ti hlengeletene ha yini na vona, Ku pfukela Yehovha ni Muhlawuriwa wa yena?

³ Va ku: “A hi tsemeni tinsinga ta vona, A hi cukumeteni mapindza ya vona!”

⁴ Loyi a tshameke ematilweni wa va hleka; Hosi yi va sandza.

⁵ U ta vulavula na vona hi ku kariha ka yena, A va chavisa hi ku pfurha ka vukari bya yena.

⁶ A ku: “Hi mina ndzi toteke hosi yanga eSiyoni, Entshaveni ya mina leyi hlawuriweke.”

⁷ Ndzi ta twarisa makungu: Yehovha u te eka mina: “U n'wananga; Ndzi ku velekile namuntlha.

⁸ Kombela ka mina, ndzi ta ku nyika matiko, ma ta va ndzhaka ya wena. Ni makumu ya misava, ma ta fumiwa hi wena.

⁹ U ta ma tshova hi nhonga ya nsimbhi, U ta ma fayetela kukotisa mbita ya muvumbi.”

¹⁰ Sweswi, n'wina tihosi, mi va ni vutlhari; Na n'wina vaavanyisi va misava, mi dyondzisiwa.

¹¹ Tirhelani Yehovha hi xichavo, Kutani mi tsaka hi ku rhurhumela.

¹² Ntswontswani n'wana, leswaku a nga ti kariha, Kutani mi lova etindleleni ta n'wina, Hikuva vukari bya yena bya hatlisa ku pfurha. Va katekile hinkwavo lava chavelaka ka yena!