Pisalema 145 - Xitsonga (Bibele)

Ku vongiwa Xikwembu lexikulu xa tintswalo.

Pisalema ya ku vonga. Ya Davhida.

¹ Ndzi ta ku kurisa, Xikwembu xa mina, Hosi ya nga! Ndzi ta vonga vito ra wena hi mikarhi leyi nga yiki helo.

² Ndzi ta ku vonga hi masiku hinkwawo, Ndzi dzunisa vito ra wena hi mikarhi leyi nga heriki.

³ Yehovha u nkulukumba, u faneriwa hi ku vongiwa hinkwako; Vukulukumba bya yena a byi na ku pimiwa:

⁴ Rixaka rin'wana a ri byele rixaka leri tlhandlamaka mitirho ya wena, Ri twarisa mitirho ya wena leyi tlakukeke.

⁵ Ndzi ta tsundzuka vunene ni ku twala ka vukulu bya wena, Ni mitirho leyi hlamarisaka ya wena.

⁶ Vanhu va ta vula mitirho leyi chavisaka ya wena, Mina ndzi vula vukulu bya wena.

⁷ A ku dzunisiwe ku anakanya ka tintswalo ta wena letikulu, A ku huveriwe ni ku lulama ka wena!

⁸ Yehovha u ni tintswalo u ni nsovo, U hlwela ku kariha u tsetselela ngopfu.

⁹ Yehovha u ni vunene ka hinkwavo, Tintswalo ta yena ti eneta mitirho hinkwayo ya yena.

¹⁰ Yehovha, mitirho ya wena hinkwayo ya ku dzunisa, Ni lava ku rhandzaka va ku vonga!

¹¹ Va ta vula ku kwetsima ka ku fuma ka wena, Va twarisa matimba ya wena.

¹² Va ta tivisa vana va vanhu mitirho ya wena, Ni vukulu bya ku kwetsima ka vuhosi bya wena.

¹³ Ina, ku fuma ka wena i ku fuma ka mikarhi hinkwayo, Ni vuhosi bya wena byi kona ku yisa etinxakeni leti nga heriki.

¹⁴ Yehovha u seketela hinkwavo lava khunguvanyekaka, Kutani u olola lava korhamisiweke.

¹⁵ Mahlo ya swivumbiwa hinkwaswo ma langutile ka wena, Kutani u swi nyika swakudya hi nkarhi wa swona.

¹⁶ U funungula xandla xa wena, U xurhisa hinkwaswo leswi hanyaka.

¹⁷ Yehovha u lulamile etindleleni ta yena hinkwato, U ni tintswalo emitirhweni ya yena hinkwayo.

¹⁸ Yehovha u le kusuhi ni hinkwavo lava n'wi khongelaka, Ni ka hinkwavo lava n'wi khongelaka hi timbilu.

¹⁹ U nyika lava n'wi chavaka leswi va swi rhandzaka, U yingisa swirilo swa vona, kutani wa va kutsula.

²⁰ Yehovha u londzovota hinkwavo lava n'wi rhandzaka, Kambe wa lovisa lavo biha hinkwavo.

²¹ Nomu wa mina a wu bumabumele Yehovha, Kutani swivumbiwa hinkwaswo a swi vonge vito ra yena leri hlawuriweke, Hi masiku ni masiku lama nga heriki!