Pisalema 144 - Xitsonga (Bibele)

Risimu ra munhu la lavaka ku pfuniwa enyimpini.

Ya Davhida.

¹ A ku vongiwe Yehovha, matimba ya mina, La letelaka mavoko ya mina nyimpi, Ni tintiho ta mina ku lwa.

² Hi yena tintswalo ta mina ni khokholo ra mina, Khokholo lero tlakuka ra mina ni mulamuleri wa mina, Xitlhangu ni xichavelo xa mina, Yena la ndzi tsongahatelaka tiko ra mina.

³ Yehovha, xana munhu i yini, leswaku u n'wi tiva? Ni n'wana wa munhu, leswaku u n'wi hlayisa?

⁴ Munhu u fana ni ku hefemula, Masiku ya yena ma fana ni ndzhuti lowu hundzaka.

⁵ Yehovha, xikisa matilo ya wena, u xika! Khumba tintshava ti mpukuka!

⁶ Hatimisa rihati, u hangalasa valala va mina! Copa miseve ya wena, u va hangalasa!

⁷ Tshambuluta mavoko ya wena, u ndzi kutsula, U ndzi humesa ematini lamakulu, U ndzi ponisa evokweni ra vana va matiko,

⁸ Valavo, milomu ya vona yi vulaka swahava, Ni voko ra vona ra xinene ri nga voko ra vuxisi!

⁹ Oho Xikwembu! Ndzi rhandza ku ku yimbelelela risimu lerintshwa, Ndzi ta ku dzunisa hi haripa ya khume ra tingoti.

¹⁰ Hi wena la nyikaka tihosi ku hlayiseka, Wena la lamuleleke nandza wa wena, Davhida, etlharini leri dlayaka.

¹¹ Ndzi kutsule, u ndzi ponisa evokweni ra vana va matiko, Lava, milomu ya vona yi vulavulaka swahava, Lava, voko ra vona ra xinene ri nga voko ra vuxisi.

¹² Vana va hina va xinuna va fana ni swimilana, Va kula evuntshweni bya vona; Vana va hina va vanhwana va fana ni maribye lama vatliweke, Lama vombisaka tindlu ta tihosi.

¹³ Tingula ta hina ti tele swakudya swa tinxakaxaka. Tihomu ta hina ti andzile hi makume ya madzana, Ti dya emadyelweni ya hina hi madzana ya madzana.

¹⁴ Mathokazi ya hina ma tswala, ku hava khombo, Ku hava ku hlaselwa ni mikosi emitsendzeleni ya hina.

¹⁵ Ku katekile tiko leri nga tano! Ku katekile tiko leri Yehovha nga Xikwembu xa rona!