Pisalema 14 - Xitsonga (Bibele)

Va dyohile hinkwavo.

Eka mufambisi wa vasimi. Ya Davhida.

¹ Xihunguki xi te embilwini ya xona: “A ku na Xikwembu!” Va borile; mitirho ya vona yi ni manyala; A ku na la endlaka swinene.

² Yehovha u langutile vana va vanhu a ri etilweni, A ta vona xana u kona la nga ni ku twisisa, La lavaka Xikwembu.

³ Hinkwavo va hambukile, va tionhile swin'we; A ku na la endlaka swinene, hambi a ri un'we.

⁴ Xana hinkwavo lava endlaka swo biha va pfumala ku tiva xana? Va dya tiko ra mina kukotisa loko ku dyiwa vuswa; A va khongeri Yehovha.

⁵ Va ta rhurhumela hi ku chava, Hikuva Yehovha u le xikarhi ka rixaka leri lulameke.

⁶ Khomisani la nga ekhombyeni hi tingana eku tshembeni ka yena! Kasi Yehovha i xichavelo xa yena.

⁷ Loko ingi ku hlayiseka ku nga tela Israele hi le Siyoni! Siku Yehovha a tlherisaka tiko ra yena eku bohiweni, Yakobo u ta tsaka, Israele u ta tsakisisa.