Pisalema 139 - Xitsonga (Bibele)

Yehovha u ndzi kambile, wa ndzi tiva.

Eka mufambisi wa vasimi. Pisalema ya Davhida.

¹ Yehovha! U ndzi kambile, wa ndzi tiva;

² U tiva loko ndzi tshama, ni loko ndzi pfuka; U tiva miehleketo ya mina u ri kule;

³ Wa ndzi kamba loko ndzi famba, ni loko ndzi etlela, Kutani u tiva tindlela ta mina hinkwato.

⁴ Hikuva rito loko ri nga si fika eririn'wini ra mina, U ri tivile hinkwaro, oho Yehovha!

⁵ U ndzi rhendzele emahlweni ni le ndzhaku, U veke xandla xa wena henhla ka mina.

⁶ Ku tiva loko, i mahlori eka mina, Ku tlakukile ngopfu ku tlurisa, ndzi tsandzeka ku ku fikela.

⁷ Xana ndzi nga ya kwihi, ndzi va kule ni moya wa wena? Kumbe ndzi nga balekela kwihi, ndzi va kule ni mombo wa wena?

⁸ Loko ndzi tlhandlukela ematilweni, u kona; Ni loko ndzi ya etlela exivandleni xa vafi, ni kwalaho u kona.

⁹ Ni loko ndzi khandziya etimpapeni ta vurhonga, Ndzi ya aka emakumu ka lwandle,

¹⁰ Na kona voko ra wena ri ta ndzi fambisa, Ni voko ra wena ra xinene ri ta ndzi khoma.

¹¹ Loko ndzi ku: “A ndzi fihliwe hi munyama — Vusiku byi ta xa emahlweni ka mina.”

¹² Eka wena, munyama wu nga ka wu nga endli ntima, Vusiku byi xa kukotisa nhlekanhi, Munyama wu nga kota ku vonakala.

¹³ Kunene hi wena la vumbeke xisuti xa mina, U ndzi vumbile ekhwirini ra manana.

¹⁴ Ndza ku khensa hikwalaho ka mahlori ya xivumbeko xa mina. Mitirho ya wena ya hlamarisa, Moya wa mina wa swi tiva swinene ngopfu.

¹⁵ Miri wa mina a wu fihliwanga ka wena, Loko ndzi ri karhi ndzi vumbiwa exihundleni, Ndzi lukeleriwa swirho eku enteni ka misava.

¹⁶ Mahlo ya wena ma vonile ku vumbiwa ka swona, Kutani masiku ya mina ma tsariwile hinkwawo ebukwini ya wena; Ma hlayiwile ma nga si va kona.

¹⁷ Oho Xikwembu miehleketo ya wena yi ndzi tsandzisa ku yini! Ntsengo wa yona yi tarisile swonghasi!

¹⁸ Loko ndzi rhandza ku yi hlaya, yi tlula sava hi ku tala. Loko ndzi khindlimuka ndza ha ri na wena.

¹⁹ Oho Xikwembu, ingi loko u lovisa lowo biha! N'wina, vanhu va ngati, tshinelani kule na mina!

²⁰ Lava nga valala eka wena, va ku vula hi ku biha, Va karhi va tlanga hi vito ra wena!

²¹ Yehovha, a ndzi va venganga lava ku vengaka xana? A ndzi karihelanga lava ku pfukelaka xana?

²² Ndzi va vengile hakunene; ka mina i valala.

²³ Xikwembu, ndzi kambe, u tiva mbilu yanga! Ndzi ringe, u tiva ku anakanya ka mina!

²⁴ Languta loko ndzi famba hi ndlela ya ku homboloka, Kutani u ndzi fambisa endleleni ya vutomi lebyi nga heriki.