Pisalema 135 - Xitsonga (Bibele)

Ku dzunisiwa Xikwembu xa Israele.

¹ Dzunisani Yehovha! Dzunisani vito ra Yehovha, Ri dzuniseni, n'wina malandza ya Yehovha,

² Lava yimaka endlwini ya Yehovha, Erivaleni ra yindlu ya Xikwembu xa hina!

³ Dzunisani Yehovha! Hikuva Yehovha u nene; Yimbelelani hi vito ra yena, hikuva ra nandziha.

⁴ Hikuva Yehovha u tihlawulele Yakobo, Na Israele, leswaku a va ndzhaka ya yena.

⁵ Ndzi tiva leswaku Yehovha i nkulukumba, Hosi ya hina yi kulukumba ngopfu ku tlula swikwembu hinkwaswo.

⁶ Hinkwaswo leswi Yehovha a swi rhandzaka, u swi endla Ematilweni ni le misaveni, Emalwandle ni le swidziveni hinkwaswo.

⁷ Hi yena la tlakusaka mapapa emakumu ka misava, La hatimisaka tilo, a nisaka mpfula, A humesaka mimoya evuhlayiselweni byakwe.

⁸ Hi yena la beke mativula ya Egipta, Ku sungula ka vanhu ku ya fika ka swifuwo.

⁹ U humesile xikarhi ka wena, eEgipta, swikombiso ni masingita, Ku ba Faro ni malandza ya yena hinkwawo.

¹⁰ Hi yena la loviseke matiko layo tala, Kutani a dlaya tihosi ta matimba,

¹¹ Sihoni, hosi ya Vaamori, na Ogo hosi ya Baxani, Ni tihosi hinkwato ta Kanana;

¹² Kutani tiko ra vona hinkwaro a ri nyiketa ku va ndzhaka, Ndzhaka ya Vaisraele; ri va tiko ra vona.

¹³ Yehovha! Vito ra wena ri tshama hi laha ku nga heriki, Yehovha! Wa tsundzukiwa etinxakeni ta tinxaka.

¹⁴ Hikuva Yehovha u ta avanyisa tiko ra yena, U ta twela malandza ya yena vusiwana.

¹⁵ Swifaniso swa swikwembu swa matiko i ntsopfu ni nsuku, I ntirho wa mavoko ya vanhu.

¹⁶ Swi ni milomu, kambe a swi vulavuri, Swi ni mahlo, kambe a swi voni,

¹⁷ Swi ni tindleve, kambe a swi twi, Ku hefemula a ku kona emilon'wini ya swona.

¹⁸ Lava swi endlaka va fana na swona, Swin'we ni hinkwavo lava swi tshembaka.

¹⁹ N'wina va yindlu ya Israele, khensani Yehovha! N'wina va yindlu ya Aroni, khensani Yehovha!

²⁰ N'wina va yindlu ya Levhi, khensani Yehovha! N'wina lava chavaka Yehovha, khensani Yehovha!

²¹ Yehovha la tiakeleke Yerusalema, a a khensiwe eSiyoni! Dzunisani Yehovha!