Pisalema 127 - Xitsonga (Bibele)

Loko Yehovha a nga aki yindlu.

Risimu ra ku tlhandluka. Pisalema ya Solomoni.

¹ Loko Yehovha a nga aki yindlu, Lava yi akaka va tikarhatela swahava. Loko Yehovha a nga hanyanyeli muti, Valanguteri a va pfuni nchumu.

² A swi mi pfuni nchumu ku vindzuka nimixo Ni ku hlwela ku ya eku etleleni, Ni ku dya vuswa lebyi vavisaka! Murhandziwa wa yena wa nyikiwa leswo tano evurhongweni bya yena.

³ Vonani, vana va xinuna, i ndzhaka ya Yehovha! Mbhandzu wa khwiri i hakelo.

⁴ Kukotisa miseve evokweni ra nhenha, Vana va vuntshwa va tano.

⁵ Ku katekile munhu loyi, nkotloto wa yena wu teleke vona, Va nga ka va nga vi na tingana Loko va ta vulavula ni valala enyangweni ya muti.