Pisalema 126 - Xitsonga (Bibele)

Loko Yehovha a vuyisa vakhomiwa va Siyoni.

Risimu ra ku tlhandluka.

¹ Loko Yehovha a vuyisa vakhomiwa va Siyoni, A hi fana ni lava lorhaka.

² Milomu ya hina a yi nga tshiki ku hleka hi ku tsaka, Ririmi ra hina a ri ba mikulungwana. Kutani a va ku exikarhi ka matiko: Yehovha u va endlele swilo leswikulu!

³ Hakunene, Yehovha u hi endlele leswikulu; Hi tsakile ngopfu hikwalaho!

⁴ Yehovha, vuyisa vakhomiwa va hina, Kukotisa milambu ya le dzongeni.

⁵ Lava byalaka loko va ri karhi va rila, Va ta tshovela va huwelela hi ku tsaka.

⁶ Va famba va ri karhi va rila loko va hlwanya mbewu, Va vuya va yimbelela tinsimu loko va rhwala tinyandza ta vona.