Pisalema 125 - Xitsonga (Bibele)

Lava tshembaka Yehovha va nga ka va nga tsekatseki.

Risimu ra ku tlhandluka.

¹ Lava tshembaka Yehovha Va fana ni ntshava ya Siyoni; yi nga ka yi nga tsekatseki, Yi ta tiya hi laha ku nga heriki!

² Yerusalema! Wu rhendzeleriwe hi tintshava, Yehovha, u rhendzerisa sweswo tiko ra yena, Sweswi ni mikarhi loyi nga heriki.

³ Hikuva vuhosi lebyo biha byi nga ka byi nga fumi ndzhaka ya lavo lulama. Hi leswaku lavo lulama va nga tshuki va nghena eku dyoheni!

⁴ Oho Yehovha! Katekisa lavanene Ni lava lulameke etimbilwini ta vona.

⁵ Kambe lava tiendlelaka tindlela to homboloka, Yehovha a va fambise swin'we ni lava endlaka swo biha! Ku rhula a ku ve ehenhla ka Israele!