Pisalema 115 - Xitsonga (Bibele)

Xikwembu lexi hanyaka ni swikwembu swahava.

¹ Oho Yehovha! Ku kwetsima ku nga vi ka hina, Ku nga vi ka hina, kambe a ku ve ka vito ra wena. Hikwalaho ka tintswalo ta wena ni vunene bya wena!

² Matiko ma nga vulela yini, ma ku: “Xi kwihi Xikwembu xa vona?”

³ Xikwembu xa hina xi le matilweni, Xi endla hinkwaswo leswi xi swi rhandzaka.

⁴ Swifaniso swa swikwembu swa vona i silivhere ni nsuku, I ntirho wa mavoko ya vanhu.

⁵ Swi ni milomu, kambe a swi vulavuri, Swi ni mahlo, kambe a swi voni,

⁶ Swi ni tindleve, kambe a swi yingisi, Swi ni tinhompfu, kambe a swi nun'hweti,

⁷ Swi tsandzeka ku khoma hi mavoko ya swona, Hi milenge ya swona a swi fambi, A ku na rito le ri humaka emikolweni ya swona.

⁸ Lava swi vumbaka va fana na swona, Ni hinkwavo lava swi tshembaka.

⁹ Israele, titshembele Yehovha! Hi yena mupfuni wa vona ni xitlhangu xa vona.

¹⁰ N'wina yindlu ya Aroni, titshembeleni Yehovha! Hi yena mupfuni wa vona ni xitlhangu xa vona.

¹¹ N'wina mi chavaka Yehovha, titshembeleni Yehovha! Hi yena mupfuni wa vona ni xitlhangu xa vona.

¹² Yehovha u hi tsundzukile, u ta katekisa; U ta katekisa yindlu ya Israele, U ta katekisa yindlu ya Aroni,

¹³ U ta katekisa lava chavaka Yehovha, Lavatsongo ni lavakulu.

¹⁴ Yehovha u ta mi andzisa N'wina ni vana va n'wina.

¹⁵ Mi vakateki va Yehovha, La endleke tilo ni misava.

¹⁶ Loko ma ri matilo, i matilo ya Yehovha, Misava, u yi nyikile vana va vanhu.

¹⁷ A hi vafi lava nga ta vonga Yehovha, Ni loko va ri lava xikeleke exivandleni xa ku miyela;

¹⁸ Kambe hina hi ta vonga Yehovha, Ku sukela sweswi, ni ku yisa hi laha ku nga heriki. Dzunisani Yehovha!