Pisalema 104 - Xitsonga (Bibele)

Yehovha muvumbi.

¹ Moya wanga, khensa Yehovha! Yehovha, Xikwembu xa mina, u nkulukumba ngopfu! U funengele ku kwetsima ni ku saseka!

² U tifunengete hi ku vonakala kukotisa nkumba, U andlale matilo kukotisa tende.

³ Wa yimisa timhandze ta tindlu ta yena leti tlakukeke exikarhi ka mati, U endle mapapa golonyi ya yena, U famba a khandziyile etimpapeni ta moya,

⁴ U teka mimoya a endla tintsumi ta yena ha yona U tlhela a teka malangavi ya ndzilo a endla malandza ya yena ha wona.

⁵ U tiyisile misava emasungulweni ya yona, Yi nga ka yi nga tsekatseki ni siku ni rin'we.

⁶ U yi funengetile hi mafuku kukotisa nkumba; Mati a ma yimile etintshaveni.

⁷ Kakuloko u tshinya, ma tsutsuma; Ni loko ma twa rito ra mpfumawulo wa wena, Ma hatlisa ku tisusa.

⁸ Tintshava ti tlakuka, mikova yi vumbeka Endhawini leyi u yi lunghiseleke kona.

⁹ U vekele mati ndzilakana leswaku ma nga tshuki ma wu tlula, Ma nga vuyi ma funengeta misava.

¹⁰ Hi yena a pfelerisaka miseledyana emikoveni; Mati ya yona ma khiringa exikarhi ka tintshava;

¹¹ Swiharhi hinkwaswo swa nhova swi nwa kona, Ni timangwa ta nhova ti tima torha eka yona,

¹² Tinyanyana ta tilo ta tiakela xisaka emabuweni ya yona, Ti twakarisa miloti ya tona emarhavini ya mirhi.

¹³ U chelete tintshava, a ri endlwini ya yena leyi tlakukeke, Misava yi xurha mihandzu ya mitirho ya wena.

¹⁴ U mirisela tihomu byanyi, Ni vanhu timbewu leti va lulamelaka. U humesa sweswo vuswa emisaveni,

¹⁵ Ni vhinyo leyi tsakisaka mbilu ya munhu, Ni mafurha lama vangamisaka mombo wa yena, Ni vuswa lebyi tiyisaka mbilu ya munhu.

¹⁶ Mirhi ya Yehovha yi xurhile, Tona tikedari ta Lebanoni leti a nga ti simeka.

¹⁷ Tinyanyana ti tiakela swisaka kona. Ntsavila wu tshama exikarhi ka tikipresi;

¹⁸ Tintshava leto leha ti lulamele tintshembe, Maribye, wona, i xichavelo xa timbila.

¹⁹ U endlile n'weti ku avanyisa lembe ha wona; Dyambu ri tiva ku pela ka rona.

²⁰ U endle munyama, kutani byi va vusiku, Kavaloko swivandzana hinkwaswo swa le swihlahleni swi tifambela.

²¹ Swinghalana swi dzuma swi lava swiharhi, Swi lava leswi swi nga dyaka swona eka Xikwembu;

²² Dyambu, loko ri huma, swa tlhela, Swi ya tifihla evukaleni bya swona.

²³ Kutani munhu a humela ntirho wa yena, Ku ya tirha ku fikela madyambu.

²⁴ Oho Yehovha! Mitirho ya wena yi tarisile ku yini! U yi endlile hinkwayo hi vutlhari; Misava yi tele rifuwo ra wena.

²⁵ Ni lwandle lerikulu, lera ku anama, Ri tele swiharhi leswi nga hlayiwiki, Leswitsongo ni leswikulu!

²⁶ Hi laha tingalava ti fambaka kona, Na yona Levhiyatani leyi u yi vumbeke Leswaku yi titlangela kona.

²⁷ Swivumbiwa hinkwaswo swi langutela wena, Leswaku u swi nyika swakudya hi nkarhi lowu fanelaka.

²⁸ Loko u swi nyika swona, swa rholela; Loko u pfula xandla xa wena, swa xurha hi ndzalo;

²⁹ Kungakuloko u fihla mombo wa wena swa tsandzeka; Loko u swi tekela ku hefemula, swa hela, Kutani swi tlhelela entshurini.

³⁰ Loko u engeta u rhuma moya wa wena Swi vuyela swi velekiwa; Kutani u sasekisa nghohe ya misava.

³¹ Ku kwetsima ka Yehovha a ku tshame hi laha ku nga heriki! Yehovha a a tsakele mitirho ya yena!

³² A languta misava, kutani yi rhurhumela; U khumba tintshava, kutani ti huma musi.

³³ Ndzi ta yimbelela Yehovha loko ndza ha hanya; Ndzi ta dzunisa Xikwembu xa mina, loko ndza ha ri kona.

³⁴ Mianakanyo ya mina a yi n'wi tsakise! Ndzi ta endla Yehovha ku tsaka ka mina.

³⁵ Vadyohi a va lovele emisaveni, Lavo biha a va nga ha vi kona! Moya wanga, khensa Yehovha! Dzunisani Yehovha!