Pisalema 103 - Xitsonga (Bibele)

Moya wanga, khensa Yehovha!

Ya Davhida.

¹ Moya wanga, khensa Yehovha! Na swona hinkwaswo leswi nga eka mina A swi khense vito ra ku kwetsima ka yena!

² Moya wanga, khensa Yehovha! U nga rivali mitirho ya yena hinkwayo lerinene!

³ Hi yena la ku rivalelaka milandzu ya wena hinkwayo, La hanyisaka mavabyi ya wena hinkwawo;

⁴ La kutsulaka vutomi bya wena ekheleni ku tlhandleka harhi ya nsovo ni tintswalo;

⁵ Hi yena la ku xurhisaka hi leswo nandziha eku dyuhaleni ka wena, Vuntshwa bya wena byi ko byi pfuxiwa kukotisa gama.

⁶ Yehovha u avanyisela lava xanisiwaka hinkwavo, A va endlela hi ku lulama.

⁷ U tivisile Muxe tindlela ta yena, Ni vana va Israele mitirho ya yena.

⁸ Yehovha u ni tintswalo ni ku tsetselela, U hlwela ku kariha, u tele vunene.

⁹ A nga tengisi hi mikarhi hinkwayo, A nga hlayisi vukari bya yena hi masiku.

¹⁰ A nga hi endlelanga hi mpimo wa ku dyoha ka hina, A nga hi rihisanga hi mpimo wa milandzu ya hina.

¹¹ Hikuva hi laha matilo ma tlakukeke ehenhla ka misava, Hi sweswo nsovo wa yena wu kurile ehenhla ka lava n'wi chavaka;

¹² Hi laha vuxa byi hambaneke ni vupeladyambu, U hambanyisile sweswo ku dyoha ka hina kule na hina.

¹³ Hi laha tatana a nga ni tintswalo eka vana va yena, Hi sweswo Yehovha u ni tintswalo eka lava n'wi chavaka.

¹⁴ Hikuva wa tiva lexi hi endliweke ha xona, Wa tsundzuka leswaku hi ntshuri ntsena.

¹⁵ Loko a ri munhu, masiku ya yena ma kotisa byanyi, Wa baleka tani hi xiluva xa nhova.

¹⁶ Hikuva moya wu hundza ehenhla ka xona, Kutani a xa ha ri kona, ni ndhawu ya xona a ya ha xi tivi.

¹⁷ Kambe nsovo wa Yehovha i wa mikarhi hinkwayo eka lava n'wi chavaka, Ni ku lulama ka yena ehenhla ka vana va vana va vona;

¹⁸ Eka lava hlayisaka ntwanano wa yena, Va tsundzuka milawu ya yena ku yi yingisa.

¹⁹ Yehovha u vekile xiluvelo xa yena ematilweni, Kutani vuhosi bya yena byi fuma swilo hinkwaswo.

²⁰ Khensani Yehovha, n'wina tintsumi ta yena, Leti tiyeke matimba, leti endlaka swileriso swa yena, Hi ku yingisa mpfumawulo wa rito ra yena!

²¹ Khensani Yehovha, n'wina tinyimpi ta yena hinkwato, Leti n'wi tirhelaka hi ku endla leswi a swi rhandzaka!

²² Khensani Yehovha, n'wina mitirho hinkwayo ya yena, Ematlhelweni ya ku fuma ka yena hinkwawo! Moya wanga, khensa Yehovha!