Pisalema 102 - Xitsonga (Bibele)

Ku vaviseka ni ku chaveleriwa ka xisiwana.

Ku khongela ka xisiwana, loko xi hele mbilu, xi humesa ku rila ka xona emahlweni ka Yehovha.

¹ Oho Yehovha, yingisa ku khongela ka mina, Ku huwelela ka mina a ku fike eka wena!

² U nga ndzi fihleri mombo wa wena hi siku ra mahlomulo ya mina! Rhiya ndleve ya wena loko ndzi vitana! Hatlisa u ndzi hlamula!

³ Hikuva masiku ya mina ma nyumba kukotisa musi; Ni marhambu ya mina ma hisa kukota swisa,

⁴ Mbilu ya mina yi biwile, yi vunile tani hi byanyi, Ndzi rivala ni ku dya vuswa bya mina.

⁵ Ku konya ka mina i kukulu swonghasi; Marhambu ya mina ma namarhela enyameni ya mina;

⁶ Ndzi fana ni gumba ra le mananga, Ni xuhunu exikarhi ka marhumbi.

⁷ A ndza ha kumi vurhongo; Ndzi fana ni nyanyana ya xisiwana exihlungweni xa yindlu.

⁸ Hi masiku hinkwawo valala va mina va ndzi sandza; Va ndzi karihela, va hlambanya hi vito ra mina.

⁹ Ndzi dya ntshuri ematshan'weni ya vuswa, Ndzi pfanganyisa swakunwa swa mina ni minyembeti,

¹⁰ Hikwalaho ka ku hlundzuka ni ku kariha ka wena; Kunene u ndzi tlakurile u ndzi wisela ehansi.

¹¹ Masiku ya mina ma fana ni ndzhuti wa madyambu, Ndzi omile kukota byanyi.

¹² Kambe wena Yehovha, u tshama hi laha ku nga heriki, Ni ku tsundzukiwa ka wena etinxakeni ta tinxaka.

¹³ U ta pfuka, u tsetselela Siyoni, Hikuva hi wona nkarhi wa ku n'wi tsetselela; Nkarhi lowu vekiweke, wu fikile.

¹⁴ Hikuva malandza ya wena ma rhandza maribye ya Siyoni, Ma rhandzisisa ni ntshuri wa yena.

¹⁵ Hi laha matiko hinkwawo ma nga ta chava vito ra Yehovha, Ni tihosi hinkwato ta misava ti chava ku kwetsima ka wena.

¹⁶ Kutakuloko Yehovha a ta pfuxa Siyoni, U ta tikombisa eku kwetsimeni ka yena.

¹⁷ U ta yingisela ku khongela ka xisiwana, A nga ka a nga nyenyi ku khongela ka yena.

¹⁸ Mhaka leyi yi ta tsaleriwa rixaka leri taka, Ni tiko lerintshwa ri ta dzunisa Yehovha.

¹⁹ Hikuva Yehovha u languta, a ri exivandleni lexo tlakuka xa vukwetsimelo bya yena, Ematilweni ya le henhla, u languta misava,

²⁰ Ku yingisa ku konya ka lava bohiweke, Ni ku tshunxa lava hlawuleriweke rifu,

²¹ Leswaku va ta twarisa vito ra Yehovha le Siyoni, Ni ku dzuna ka yena le Yerusalema,

²² Loko matiko hinkwawo ma ta hlengeletana, Ni ku fuma hinkwako, ku tirhela Yehovha.

²³ U tshovile matimba ya mina endleleni, U komisile masiku ya mina.

²⁴ Ndzi te: “Oho Xikwembu xanga! U nga ndzi susi, ndza ha ri exikarhi ka masiku ya mina; Malembe ya wena ma tshama ma ri kona etinxakeni ta tinxaka.”

²⁵ I khale u vekile masungulo ya misava, Ni matilo, i ntirho wa mavoko ya wena,

²⁶ Swi ta hela, kambe wena u ta tama u ri kona; Swi ta dyuhala kukota nguvu; U ta swi hundzuluxa tani hi xifunengelo, kutani swi ta hundzuka.

²⁷ Kambe wena u tama u ri wena. Ni malembe ya wena ma nga ka ma nga heri.

²⁸ Vana va malandza ya wena va ta tshamiseka, Ni vatukulu va vona va ta tiyisiwa emahlweni ka wena.