Ntirho 42 - Xitsonga (Bibele)

Ta ku titsongahata ni ku tisola ka Yobo.

¹ Kutani Yobo a hlamula Yehovha, a ku:

² “Ndza swi tiva leswaku a ku tsandzi hi nchumu, Hikuva a ku na makungu lawa u nga ma hetiki.

³ ‘I mani la timelaka makungu ya mina hi vuhunguki bya yena?’ Ndzi vulavurile ndzi nga ri na ku twisisa, I mahlori lama ndzi hlulaka, lawa ndzi nga ma twisisiki?

⁴ ‘Oho! Ndzi yingisele sweswi ndzi ta vulavula; Ndzi ta ku vutisa, u ta ndzi dyondzisa.’

⁵ Tindleve ta mina ti yingisile timhaka ta wena; Kambe sweswi, mahlo ya mina ma ku vonile.

⁶ Ndza tisola, ndzi tiba xifuva, Ndzi ri entshurini ni le nkumeni.”

⁷ Kuteloko Yehovha a kanerile na Yobo, Yehovha a ku eka Elifasi wa Temani: “Vukari bya mina byi pfurhele wena ni vanakuloni lavambirhi, hikuva a mi vulanga swa mina swinene kukotisa Yobo, nandza wa mina.

⁸ Hikwalaho, humesani tinkunzi ta ntlhanu na timbirhi, ni makhuna ya ntlhanu na mambirhi, mi ya eka nandza wa mina Yobo, mi ya titlhavela magandzelo, kutani Yobo, nandza wa mina, u ta mi khongelela; hikwalaho ka yena swakwe, ndzi nga ka ndzi nga mi bi hi ku hunguka ka n'wina, hikuva a mi vulavulanga swa mina hi ku lulama, kukotisa nandza wa mina, Yobo.”

⁹ Kutani Elifasi wa Temani, na Bilidada, wa Xuwaka, na Sofara wa Naama, va ya endla hi laha Yehovha a va byeleke hakona, kutani Yehovha a yingisa xikhongelo xa Yobo.

¹⁰ Kutani Yehovha a humesa Yobo eku bohiweni ka yena, loko a khongelerile vanakulobye, Yehovha a n'wi andzisela kambirhi hinkwaswo leswi ngi a ri na swona.

¹¹ Kutani vamakwavo hinkwavo va xinuna ni va xisati, ni hinkwavo lava a nga tivana na vona, va ta eka yena, va dya na yena endlwini ya yena, va hlangula mihloti ya yena va n'wi chavelela eku vavisekeni ka yena hinkwako loku Yehovha a ku tiseleke ehenhla ka yena; un'wana ni un'wana a n'wi nyika xiphemu xa silivhere ni sindza ra nsuku.

¹² Kutani Yehovha a katekisa mahetelelo ya Yobo ku tlurisa ku sungula ka yena; a fuwa tinyimpfu ta 14 000, ni tikamela ta 6 000, ni tihavi ta majoko ya 1 000, ni timbhongolo ta mantswele ta 1 000.

¹³ A kuma ni vana va vavanuna va ntlhanu na vambirhi, ni vanhwanyana vanharhu;

¹⁴ lowo rhanga, a n'wi tshula vito ra Yemima, wa vumbirhi, Kesiya, wa vunharhu, Kereni-Hapuku.

¹⁵ Etikweni hinkwaro, a ku nga ri na wansati la nga kotaka vana va Yobo hi ku saseka. Tata wa vona a va pambulela ndzhaka exikarhi ka vamakwavo.

¹⁶ Endzhaku ka swona, Yobo a hanya malembe ya 140, a vona vana vi yena ni vana va vona, ku fika erixakeni ra vumune.

¹⁷ Kutani Yobo a fa a dyuhele, a talele hi masiku.