Ntirho 40 - Xitsonga (Bibele)

¹ Kutani Yehovha a vulavula na Yobo, a ku:

² “Xana mukaneti u ta tenga yini ni Lowa matimba hinkwawo? La landzulaka mhaka ni Xikwembu a a hlamule!”

³ Kutani Yobo a hlamula Yehovha, a ku:

⁴ “Vona, ndzi lontsongo ntsena, ndzi nga ku hlamula yini? Ndzi veka voko ra mina enon'wini wa mina.

⁵ Ndzi vulavurile kan'we, a ndzi nga ha hlamuli; Ndzi angule kambirhi, a ndzi nga ha vuli nchumu.”

⁶ Kutani Yehovha a hlamula Yobo a ri exihuhurini, a ku:

⁷ “Wa nga tiboha swisuti kukota wanuna; Ndzi ta ku vutisa, wena u ndzi hlamula.

⁸ Xana kunene u nga handzula ku lulama ka mina? Xana u ta ndzi kaneta ku tibasisa-ke?

⁹ U ni voko leri fanaka ni ra Xikwembu xana? Ni rito ra wena ri nga pfuma kukota ra xona-ke?

¹⁰ “Tifunengete hi vuhosi ni vukulukumba, U tibombisa hi ku kwetsima ni vumbhurhi,

¹¹ U chela ku hiseka ka vukari bya wena, U languta vatikukumuxi hinkwavo, u va tsongahata!

¹² Languta vatiarisi hinkwavo, u va wisa, U kandziyela timbabva laha ti yimaka kona;

¹³ U va lahla hinkwavo entshurini, U yimbela mimombo ya vona emunyameni!

¹⁴ Hi laha, na mina, ndzi nga ta tiva ku ku dzunisa, Hikuva voko ra wena ra xinene ingi ri ku hlayisile!

¹⁵ “Languta mpfuvu leyi ndzi yi endleke swin'we na wena; Yi dya byanyi kukota homu.

¹⁶ Vona, matimba ya yona ma le xisutini xa yona, Ni ku tiya ka yona ku le misiheni ya khwiri ra yona;

¹⁷ Yi yimisa ncila wa yona kukotisa kedari, Misiha ya mirumbi ya yona yi lukiwe swin'we.

¹⁸ Marhambu ya yona, ingi i timpompi ta koporo; Swirho swa yona swi fana ni timhandze ta nsimbhi.

¹⁹ “I xirhangana xa mitirho ya Xikwembu; Loyi a yi vumbeke u yi nyikile tlhari ra yona;

²⁰ Tintshava ti yi mirisele byanyi bya yona, Laha swiharhi swa nhova swi tlangelaka kona.

²¹ Yi etlela emindzhutini ya lotusi. Ni le vufihlelweni bya tinhlanga ni bya mitlhangasi;

²² Mirhi ya lotusi yi yi funengeta hi mindzhuti ya yona; Mixumati ya nambu yi yi rhendzeleka exikarhi.

²³ Loko milambu yi tala, a yi chavi nchumu, A yi hlamari ni loko Yordani a nga kukumuka ku fika enon'wini wa yona.

²⁴ Xana u ta ringeta ku yi khoma yi ri karhi yi ku languta, Kumbe u nga yi phasa ku yi boxa nhompfu xana?