Ntirho 4 - Xitsonga (Bibele)

¹ Kutani Elifasi wa Temani, a hlamula, a ku:

² “Loko hi tiya ku vulavula na wena, xana hi ta ku karhata-ke? Kambe la nga tibohaka i mani, leswaku a nga vulavuri?

³ Vona, a u dyondzisa vanhu lavo tala, U tiyisa va mavoko lama karheleke:

⁴ Rito ra wena a ri pfuxa lava heleke matimba, U tiyisa matsolo la ma rhekarhekaka.

⁵ Kutani loko khombo ri ku humelele, wa tsana! Loko ri ku khumbile, wa nembuluka!

⁶ Vukhongeri bya wena a hi ku tshemba ka wena xana? Xana a ku titshembisi hi ku pfumala nandzu eku hanyeni ka wena xana?

⁷ “Wa nga tsundzuka, i mani a nga lova a nga ri na nandzu? Va kwihi lavo lulama lava nga lovisiwa?

⁸ Mina ndzi swi vonile, lava rimeke ku homboloka, Va byale ku pfilunganya, va tshovele swona;

⁹ Va lovile hi ku huhuta ka Xikwembu, Va herisiwile hi ku hefemula ka ku kariha ka xona.

¹⁰ Ku dzumadzuma ka nghala ku herile, Meno ya tinghalanyana ma tshoviwile;

¹¹ Nghala leyi tiyeke yi fa hi ku pfumala, Kutani swivanana swa nghala ya ntswele swi hangalasiwile.

¹² “Kambe ndzi fikeriwe hi rito rin'wana, Ndleve ya mina yi twa mahlevo ya rona.

¹³ Kakuloko mianakanyo yi pfuxiwa hi ku vona ka vusiku, Enkarhini lowu vurhongo byi khomaka vanhu,

¹⁴ Ku tshuka ni ku rhurhumela swi ndzi wela ehenhla, Swi dzedzemerisa ni marhambu ya mina hinkwawo;

¹⁵ Ndzhuti wu hundza emahlweni ka mina, Misisi hinkwayo ya mina yi ku dzuu.

¹⁶ Xifaniso lexi ndzi nga tsandzeka ku hlamula xiyimo xa xona, xi yima emahlweni ka mina. Ndzi twa ku te ti-ti-ti, kutani rito ri vulavula khwatsi na mina, ri ku:

¹⁷ ‘Xana wa ku fa a nga lulama emahlweni ka Xikwembu xana? Kumbe munhu a nga basa emahlweni ka muvumbi wa yena xana?

¹⁸ Vona, swi tsandza ni malandza ya xona, a xi va tshembi, Xi vona vuhunguki ni le ka tintsumi ta xona!

¹⁹ Swi nga vi tano ngopfu eka lava akeke tindlu ta vumba! Va humile entshurini, va phyandlasiwa kukotisa xivungu.

²⁰ Ku sungula nimixo ku fika madyambu, va khandliwa, Va lova hilaha ku nga heriki, va nga tsundzukiwi;

²¹ Risinga leri tiyisaka vutomi bya vona ri tsemiwa, Va fa, va nga si kuma vutlhari.’