Ntirho 36 - Xitsonga (Bibele)

¹ Elihu a yisa timhaka emahlweni, a ku:

² “Wa nga ndzi rhulela mbilu switsongo, ndzi ta ku tsundzuxa, Hikuva ndza ha ri ni lexi ndzi nga xi vulelaka Xikwembu.

³ Ndzi ta landza ku tiva ka mina ekule, Ndzi ta veka La lulameke emuvumbi wa mina.

⁴ Hikuva kunene marito ya mina a hi ya ku hemba; Emahlweni ka wena, ku yima la hetisekeke eku tiveni.

⁵ “Vona, Xikwembu xi ni matimba, kambe a xi tengisi munhu; Xikulu hi matimba ya ku twisisa ka xona.

⁶ A xi hlayisi vutomi bya mbabva, Xi avanyisela lava xanisiwaka,

⁷ A xi fularheli lavo lulama, Kambe xi va veka ni tihosi exiluvelweni, Xi va tshamisisa kona hi masiku leswaku va kurisiwa.

⁸ Kungakuloko va bohiwile hi timpecana, Loko va bohiwa hi tinghole ta makhombo,

⁹ Xi va hlavutela ku endla ka vona, Ni ku dyoha ka vona, hikuva va tikukumuxile;

¹⁰ Xi pfula tindleve ta vona leswaku ti yingisa ku laya, Xi va byela ku tshika ku homboloka.

¹¹ Loko va yingisa, kutani va xi tirhela, Va ta hetisela masiku ya vona eku katekeni, Ni malembe ya vona eku tsakeni.

¹² Kambe loko va nga yingisi, va ta tlhaviwa hi tlhari, Va lova hi ku kala ku twisisa.

¹³ “Va timbilu to biha va tihlengeletela vukari, A va khongeri Xikwembu loko xi va bohile;

¹⁴ Va fa va ha ri lavantshwa, Vutomi bya vona byi lova kukota bya vaoswi.

¹⁵ Kambe xi ponisa xisiwana emakhombyeni ya xona, Xi pfula tindleve ta swona ha wona mahlomulo.

¹⁶ Xi ta ku ponisa na kona emin'waleni ya masangu, Xi ku veka endhawini laha u nga kamanyetiwiki, Swakudya leswi xawulaka swi ta vekiwa etafuleni ra wena.

¹⁷ “Kambe loko u tele miehleketo ya timbabva, Ku biwa ku ta landzelana ni ku avanyisa.

¹⁸ Vukari byi nga tshuki byi ku yisa exisolweni, Ni vukulu bya ndziho byi nga ti ku hambuxa.

¹⁹ Ku huwelela ka wena ku nga ku humesa ekhombyeni xana? Hambi ma ri matimba hinkwawo ya wena ma nga ku pfuna xana?

²⁰ U nga tshuki u navela vusiku, Lebyi susaka vanhu endhawini ya vona.

²¹ Tilangutele, u chava ku tinyiketa leswo biha, Hikuva u swi hlawurile ku tlula mahlomulo.

²² Vona, Xikwembu xi tlakukile hi matimba ya xona, I mani la dyondzisaka kukotisa xona?

²³ I mani la nga xi dyondzisaka ndlela ya xona? I mani la nga ku eka xona: ‘U endlile swo biha’?

²⁴ “U nga tshuki u rivala ku twakarisa mitirho ya xona. Leyi dzunisiwaka hi tinsimu ta vanhu.

²⁵ Yi langutiwa hi vanhu hinkwavo, Hambi munhu wa ku fa a yi languta a ri kule.

²⁶ Xikwembu i xikulu, kambe hi nga ka hi nga tivisisi vukulu bya xona; Ntsengo wa malembe ya xona a wu hlayiwi.

²⁷ Xi tlhandlukisa mathonsi ya mati, Kutani mpfula yi na, yi huma emapapeni lama vumbiweke hi xona;

²⁸ Mapapa ma halata timpfula, Ma ti nisela ehenhla ka vunyingi bya vanhu.

²⁹ I mani la tivisisaka ku handzuka ka mapapa, Ni mpfumawulo wa ntsonga wa xona?

³⁰ Vona, xi haxa ku vonakala emahlweni ka xona, Kutani xi tifunengeta hi swidziva swa malwandle.

³¹ Xi avanyisa vamatiko ha swona; Kambe xi va nyika ha swona swakudya leswo tala.

³² Xi tatela mavoko ya xona hi rihati, Xi hlasela ha rona valala va xona.

³³ Mpfumawulo wa rona wu xi vikela, Swi tsandza ni swifuwo, swi tiva loko xi tshinela.