Ntirho 34 - Xitsonga (Bibele)

¹ Elihu a engeta a vulavula, a ku:

² “N'wina lavo tlhariha, yingisani timhaka ta mina! Rhiyani tindleve, n'wina vini va ku twisisa!

³ Hikuva ndleve yi ringa timhaka, Kukota malaka loko ma nantswa swakudya.

⁴ A hi laveni leswi lulameke, Hi languta swin'we leswi nga ni vunene.

⁵ Hikuva Yobo u te: ‘Ndzi lulamile, Xikwembu xi kanetile ku lulama ka mina.

⁶ Hambi ndzi lulamile, ndzi endliwa muhembi; Ndzi tlhaviwile hi nseve lowu dlayaka, ndzi nga ri na nandzu.’

⁷ Munhu i mani la kotisaka Yobo, La nwaka mapfindlu kukota mati xana?

⁸ Hikuva a famba exikarhi ka lavo biha, A longoloka ni swidyohi.

⁹ Hikuva u te: ‘Munhu a nga pfuniwi nchumu, Hi ku tsakela ku va na Xikwembu.’

¹⁰ “Hikwalaho n'wina vavanuna vo twisisa, ndzi yingiseni! Swo biha swi le kule na Xikwembu; A ku na ku homboloka eka Lowa matimba hinkwawo!

¹¹ Hikuva u tlherisela eka munhu leswi ringanaka mitirho ya yena. U n'wi nyika ku ringana mikhuva ya yena.

¹² Kunene, Xikwembu a xi endli lexi nga lulamangiki; Lowa matimba hinkwawo a nga ka a nga hombolosi ku lulama.

¹³ I mani loyi a vekeke misava eku leriseni ka yena? I mani la n'wi tshembiseke xirhendzevutana xa misava hinkwayo?

¹⁴ Loko xi tianakanya xi ri xoxe ntsena, Loko xi titekela moya wa xona ni ku huhutela ka xona,

¹⁵ Nyama hinkwayo ingi yi ta fa kan'we, Munhu u ta tlhelela entshurini.

¹⁶ “Loko u ni ku twisisa, yingisa mhaka leyi, U yingisisa mpfumawulo wa marito ya mina!

¹⁷ La vengaka ku lulama u ta fuma xana? Kumbe u nga kaneta lowo lulama ha kunene-ke?

¹⁸ Xana va ta ku eka hosi: ‘U bihile!’ ni ka tihosana: ‘Mi vadyohi?’

¹⁹ Xikwembu a xi yi hi nghohe ya tihosi, A xi languti vafuwi ku tlula swisiwana; Hikuva hinkwavo i mitirho ya mavoko ya xona.

²⁰ Va ku fa hi nkarhinyana, Exikarhi ka vusiku, vanhu va tiko va tsekatseka, va hundza; Lava matimba va tlherisiwa, ku nga ri hi voko ra munhu.

²¹ “Hikuva mahlo ya xona ma languta mikhuva ya vanhu. Xi languta mafambele ya vona hinkwawo.

²² A ku na munyama, a ku na mindzhuti ya rifu, Laha vadyohi va nga tumbelaka kona.

²³ Hikuva Xikwembu a xi lavi nkarhi lowo leha ku tiva munhu; Xi ta n'wi humesa eku avanyisiweni emahlweni ka xona;

²⁴ Xi pfutlakanya vamatimba, xi nga vutisi nchumu, Xi veka van'wana ematshan'weni ya vona;

²⁵ Hikuva xi tiva mitirho ya vona, Xi va wisa nivusiku, xi va phyandlasa;

²⁶ xi va ba kukota swidyohi, Emahlweni ka vanhu hinkwavo,

²⁷ Hikuva va xi fularhele; A va xiyangi tindlela hinkwato ta xona.

²⁸ Va tlhandlukisile eka xona mihuwelelo ya swisiwana; Xi twile mikosi ya vanhlomulo.

²⁹ Loko xi va humesela ku rhula, i mani la nga endlaka dzolonga xana? Loko xi fihla mombo wa xona, i mani la nga ta xi vona? Xi fuma matiko ni vanhu hi mukhuva wun'we,

³⁰ Leswaku munhu wa mbabva a nga tshuki a fuma, Vanhu va nga ti phasiwa.

³¹ “Hikuva xana u kona la nga ku eka Xikwembu. ‘Ndzi biwile, a ndzi nga ha tlheli ndzi dyoha.

³² Ndzi kombe lexi ndzi nga xi voniki, Loko kumbe ndzi dyohile, a ndzi nga ha swi endli’?

³³ Xana Xikwembu xi ta vutisa wena loko xi avanyisa? Hi wena la fanelaka ku hlawula ku nga ri mina, Loko swi ri tano, humesa leswi u swi tivaka!

³⁴ Vavanuna va ku twisisa va ta vula kukota mina. Ni munhu wo tlhariha, la ndzi yingisaka, u ta ku:

³⁵ ‘Yobo a nga vulavuri hi ku twisisa, Timhaka ta yena a ti twakali.’

³⁶ Ingi ndzi rhandza leswaku u ringiwa ku yisa emahlweni, Leswi a hlamuleke hi mukhuva wa lavo biha!

³⁷ Hikuva u engeterile ku dyoha ka yena hi ku homboloka, A phokotela mavoko exikarhi ka hina, A andzisa marito ya yena ku pfuka Xikwembu.”