Ntirho 21 - Xitsonga (Bibele)

¹ Kutani Yobo a hlamula, a ku:

² “Yingiselani, yingiselani marito ya mina, Mi ndzi nyika ku chavelela koloko.

³ Ndzi tshikeni, ndzi vulavula; Loko ndzi vulavurile, u ta tiva ku ndzi hleka.

⁴ Xana ndzi vilela hi vanhu xana? Swi nga va yini loko mbilu ya mina ya vilela-ke?

⁵ Ndzi languteni hi mahlo mi ta hlamala; Mi nga veka mavoko emilon'wini ya n'wina.

⁶ Loko ndzi swi tsundzuka, ndzi khomiwa hi ku chava, Kutani miri wa mina wu kindlimuka.

⁷ Xana timbabva ti hanya ha yini? Va dyuhala, va talela hi xuma ha yini xana?

⁸ Rixaka ra vona ri tiyisiwa na vona emahlweni ka vona, Ni vatukulu va vona va yima emahlweni ka vona.

⁹ Tindlu ta vona ti tshamile eku tsakeni, ti sirheriwa, a ti chavi, Nhonga ya Xikwembu a yi tshami ehenhla ka vona.

¹⁰ Tinkunzi ta vona a ti pfumali vana, Mathokazi ya vona ma tswala, a ma holoti.

¹¹ Vana va vona va huma etindlwini kukotisa ntlhambi, Swihlangi na swona, swa tlalamba.

¹² Va yimba miloti ya swingomana ni mandzandzana, Va titsakisa hi vunanga.

¹³ Va heta masiku ya vona emitlangweni, Kutani va xikela endhawini ya vafi hi nomu lowu.

¹⁴ Hambiswiritano, va ku eka Xikwembu: ‘Suka eka hina, A hi rhandzi ku tiva tindlela ta wena.

¹⁵ Lowa matimba hinkwawo i yini, leswaku hi n'wi tirhela, Hi ta kuma yini hi ku n'wi khongela xana?’

¹⁶ Vonani! Ku tsaka ka vona a ku le mavokweni ya vona-ke? Ku tiyingisa ka timbabva a ku ve kule na mina!

¹⁷ “Hi nkarhi wun'wana rivoni ra timbabva ri timeka, A va tali ku wela hi khombo, Xikwembu a xi andzise ku va avela vukari bya xona.

¹⁸ Va kota byanyi lebyi hungiwaka hi mheho, Kumbe mungu lowu vutliwaka hi xihuhuri.

¹⁹ Mi ku: ‘Xikwembu xi hlayisela vana ku biwa ka ku homboloka ka tata wa vona,’ Kambe a xi n'wi be yena, a ta yingisa!

²⁰ A a tivone yena hi mahlo ya yena ku wa ka yena, A nwisiwa vukari bya Lowa matimba hinkwawo,

²¹ Hikuva a nga vuri nchumu hi yindlu ya yena ni vana va yena, Loko ntsengo wa tin'hweti ta yena wu herile.

²² Xana Xikwembu xi nga dyondzisiwa vutivi? Kasi hi xona lexi avanyisaka mimoya ya le tilweni!

²³ Un'wana u fa a tshamile endzalweni, A tsakile a ri ni ku rhula loko nandziha.

²⁴ Matshanga ya yena ma tele ntswamba, Ni mongo wa marhambu ya yena wu tsakama hi masiku.

²⁵ Kasi un'wana u fela emasangwini ya moya wa yena, A nga nantswangi ku tsaka.

²⁶ Lavambirhi va etlele entshurini, va xaxamele, Swivungu swi va funengeta havambirhi.

²⁷ “Vonani, ndzi tiva mianakanyo ya n'wina, Ni ku avanyisa loku mi ndzi avanyisaka ha kona, loku nga lulamangiki.

²⁸ Hikuva mi ri: ‘Yi kwihi yindlu ya hosanyana? Wu kwihi ntsonga wa timbabva laha ti akeke kona?’

²⁹ Xana a mi vutisanga vaendzi xana? Mi hlula hi yini ku pfumela vumbhoni lebyi tiyisiwaka hi vona?

³⁰ Loko va ku: ‘Timbabva ta sirheleriwa hi siku ra ku onhaka, Hi siku ra vukari, ti vekiwa hitlhelo.’

³¹ I mani la nga ta n'wi holovela emahlweni hikwalaho ka mafambele yakwe, U ta tlheriseriwa hi mani leswi a nga swi endla?

³² U yisiwa esirheni. Kutani wa ha ri yena la langutelaka exitsulutsulwini xa rona.

³³ Mabuwu ya nkova ma vevuka ehenhla ka yena; Vanhu hinkwavo va longolokile hile ndzhaku ka yena, Lavo rhanga a va hlayiwi hi ku tala ka vona.

³⁴ Loko swi ri tano mi ndzi humesele yini ku chavelela ka hava? Eku hlamuseleni ka n'wina ku sele mona ntsena.”