Ntirho 15 - Xitsonga (Bibele)

¹ Elifasi wa Temani a hlamula, a ku:

² “Xana munhu wa vutlhari a nga hlamula hi timhaka ta hava xana? Xifuva xa yena xi nga tshuka xi tele moya wa le vuxeni xana?

³ Xana ku hlamula ka yena ku fana ni loko ku nga ri nchumu? Ni marito ya yena ma nga pfumala ku pfuna-ke?

⁴ Na wena u herisa ku chava ka Xikwembu, U sivela xikhongelo emahlweni ka Xikwembu,

⁵ Hikuva ku homboloka ka wena ku risa nomu wa wena, Hambi u tekele marito ya vumbabva.

⁶ Nomu wa wena, hi wona lowu ku kanetaka, a hi mina, Kambe milomu ya wena i timbhoni leti ku hehlaka.

⁷ “Xana hi wena munhu la nga rhanga a tswariwa-ke? U humele, tintshava ti nga si va kona xana?

⁸ Xana u dyondzile makungu ya Xikwembu, U titekele vutlhari xana?

⁹ U tiva mhaka yihi leyi hi nga yi tiviki? U twisisa mhaka yihi leyi hina hi nga yi twisisiki?

¹⁰ Van'wana va kona exikarhi ka hina lavakulu, va misisi yo basa, Lava tlulaka tata wa wena hi malembe.

¹¹ Xana u tsan'wa ku chavelela ka Xikwembu, Ni marito ya ku olova lawa u khongoteriwaka ha wona?

¹² Mbilu ya wena yi ku yisa kwihi xana? U ponyola mahlo ya wena ha yini-ke?

¹³ Loko u pfukela Xikwembu vurhenha, Ni loko nomu wa wena wu humesile marito layo nghasi.

¹⁴ Munhu i yini leswaku a basa? La velekiweke hi wansati i yini, leswaku a lulama?

¹⁵ Vona, swi tsandza ni vakwetsimi va xona, a xi va tshembi, Hambi ma ri matilo, a ma basanga emahlweni ka xona,

¹⁶ Ngopfungopfu xi nga tsandzeka ku tshemba munhu wa thyaka la onhakeke, La nwaka ku homboloka kukotisa mati!

¹⁷ “Ndzi ta ku dyondzisa, u ndzi yingisela! Ndzi ta ku byela leswi ndzi swi voneke,

¹⁸ Leswi vuriwaka hi lava vutlhari, Leswi va nga swi fihlangiki hilaha va nga swi teka eka vatata wa vona.

¹⁹ Hilaha tiko ingi ri nyikiwile vona ntsena, Ku nga ri na wumbe wa matiko la ngheneke exikarhi ka vona.

²⁰ Munhu wa mbabva wa xaniseka hi masiku hinkwawo ya ku hanyaka yena, Hi malembe hinkwawo lawa a ma averiweke.

²¹ Nkosi wu pfuma etindleveni ta yena, Hambi ku tsakiwile, muonhi a n'wi wela ehenhla;

²² A nga tshembi leswaku u ta huma emunyameni, Fumu ri n'wi etlelele;

²³ U pepetseka hala ni hala a lava swakudya swi kwihi xana? U tiva leswaku siku ra munyama ri n'wi tshinelele.

²⁴ Makhombo ni ku xaniseka swi n'wi chavisa, Swi n'wi kama kukotisa hosi leyi tilunghiseleke ku huma nyimpi.

²⁵ Hikuva u tshambulutile voko ra yena ku lwa na Xikwembu, U yeyisile Lowa matimba hinkwawo.

²⁶ U tsutsumile ku lwa na yena, a tiyisa nhamu, A tisirhelela ehansi ka mihlana ya switlhangu swa yena.

²⁷ Hikuva mombo wa yena wu nonile, U nonisile matsheve ya yena.

²⁸ Hikwalaho u ta aka emitini leyi onhakeke, Etindlwini leti tshikiweke, leti lavaka ku endla rhumbi.

²⁹ A nga ka a nga fuwi; rifuwo ra yena ri nga ka ri nga sali, Ni vukosi bya yena byi nga ka byi nga andzi emisaveni.

³⁰ A nga ka a nga poni munyama; Ritshwa ri ta omisa marhavi ya yena, U ta susiwa hi ku huhuta ka nomu wa yena.

³¹ Hambi a titshembisa hi swo biha, o tikanganyisa, Hikuva u ta kuma hakelo ya yena leyo biha;

³² Malembe ya yena ma nga si hela, u ta yi kuma, Marhavi ya yena ma nga ka ma nga hluki.

³³ U ta kotisa vhinya leyi tshikaka mihandzu ya yona ya ha ri mimbisi, Ni kukota mutlhwari lowu hohlokaka vulangi bya wona.

³⁴ Hikuva yindlu ya lowo biha yi ta nyumba, Kutani ndzilo wu ta dya ntsonga wa lowo homboloka.

³⁵ U ahlamula ku biha, u tswala ku homboloka. Exifuveni xa yena ku tirha ku tikanganyisa.”