Ntirho 1 - Xitsonga (Bibele)

Ta Yobo loko a ri ekhombyeni, a endzeriwa hi vanakulobye vanharhu.

¹ Munhu a a ri kona etikweni ra Usi, vito ra yena a a ri Yobo. A a ri munhu la fambaka hi ku tenga ni ku lulama; a chava Xikwembu, a tinga swo biha.

² A a velekile vana va ntlhanu na vambirhi, ni vanhwanyana vanharhu.

³ Swifuwo swa yena a ti ri tinyimpfu ta 7 000, ni tikamela ta 3 000, ni tihomu leti ringanaka majoko ya 500, ni timbhongolo ta matswele ta 500, ni malandza layo tala; munhu yeloyi a a tlula vavanuna hinkwavo va le vuxeni hi vukulu.

⁴ Vana va yena a va ri ni mukhuva wo endlelana mikhuvo etindlwini ta vona, un'wana ni un'wana hi siku ra yena; a va vitana ni vamakwavo va xisati lavanharhu ku ya dya ni ku nwa na vona.

⁵ Kuteloko va hetile mikhuvo ya vona, Yobo a a va vitana ku ta va basisa, a pfuka nimixo, a tlhava magandzelo yo hisiwa lama ringanaka ntsengo wa vona hinkwavo, hikuva Yobo a a ku: “Kumbe vana va mina va dyohile; va rivele Xikwembu etimbilwini ta vona.” Yobo a a tshama a endlisa sweswo hi masiku hinkwawo.

⁶ Siku rin'wana vana va Xikwembu va ya humelela emahlweni ka Yehovha na yena Satana a nghena exikarhi ka vona.

⁷ Kutani Yehovha a ku eka Satana: “U huma kwihi?” Satana a hlamula, a ku eka Yehovha: “Ndzi huma emisaveni, a ndzi valanga kona.”

⁸ Yehovha a ku eka Satana: “A ku tsundzukanga Yobo nandza wa mina xana? Hikuva a ku na munhu la fanaka na yena emisaveni, la fambaka hi ku lulama ni ku tenga, la chavaka Xikwembu ni ku fularhela swo biha.”

⁹ Satana a hlamula, a ku eka Yehovha: “Xana Yobo a chava Xikwembu ntsena?

¹⁰ Xana a hi leswi u n'wi sivelelaka yena, ni yindlu ya yena, ni swilo hinkwaswo swa yena-ke? A ku andzisanga mitirho ya mavoko ya yena, ni ku andzisa mitlhambi ya yena emisaveni xana?

¹¹ Wa nga tshambuluta voko ra wena u khumba hinkwaswo leswi a nga na swona, u ta vona xana a nga ka a nga ku sandzi emahlweni erivaleni-ke?”

¹² Yehovha a ku eka Satana: “Vona, leswi a nga naswo hinkwaswo, ndzi swi veka emavokweni ya wena; ntsena, u nga yisi voko ra wena emirini wa yena.” Kutani Satana a suka emahlweni ka Yehovha.

¹³ Hi siku rin'wana, vana va Yobo va xinuna ni va xisati, kakuloko va dya, va nwa vhinyo endlwini ya hosi ya vona,

¹⁴ ku fika ntsumi eka Yobo, yi ku eka yena: “Tihomu a ti rima, ni timbhongolo a ti dya ekusuhi na tona;

¹⁵ kutani va ka Xeba va hi wela ehenhla, va teka swifuwo, va dlaya varisi hi matlhari; ku pona mina ntsena ndzi ku byelaka.”

¹⁶ Kakuloko yeloyi a ha vulavula, ku fika un'wana, a ku: “Ndzilo wa Xikwembu wu wile hi le henhla, wu hisile tinyimpfu ni varisi, va herile; ku lo pona mina ntsena ndzi ku byelaka.”

¹⁷ Yeloyi loko a ha vulavula, ku fika un'wana, a ku: “Vakalediya va mavandla manharhu va wele tikamela ehenhla, va ti byisa, va dlaya ni varisi hi matlhari; ku pona mina ntsena ndzi ku byelaka.”

¹⁸ Yeloyi a ha vulavula, ku fika un'wana a ku: “Vana va wena va vavanuna ni va vavasati loko va ri karhi va dya, va nwa vhinyo endlwini ya hosi ya vona,

¹⁹ moya lowukulu wu huma hi le mananga, wu ba tinhla ta mune ta yindlu, yi wela ehenhla ka vona, yi va dlaya, ku pona mina ntsena ndzi ku byelaka.”

²⁰ Yobo a yima, a handzula tinguvu ta yena, a byewula nhloko, a tiwisa ehansi a khinsama, a ku:

²¹ “Ndzi humile ekhwirini ra manana ndzi ri hava nchumu, ndzi ta tlhelela kona ndzi ri hava nchumu. Yehovha u ndzi nyikile, Yehovha u tlhele a teka; a ku dzunisiwe vito ra Yehovha!”

²² Eka swona hinkwaswo, Yobo a nga sandzanga, a nga vekangi nandzu eka Xikwembu, ni lowutsongo.