Nhlavutelo 14 - Xitsonga (Bibele)

Xinyimpfana ni vakutsuriwa va xona entshaveni ya Siyoni.

¹ Kutani ndzi languta, ndzi vona Xinyimpfana xi yimile entshaveni ya Siyoni, xi ri ni lava tsariweke vito ra xona emimombyeni ya vona, va ri 144 000.

² Kutani ndzi twa rito leri humaka etilweni leri fanaka ni mpfumawulo wa mati layo tala, ni mpfumawulo wa ku pfuma lokukulu ka tilo; kutani rito rero ndzi ri tweke ri fana ni rito ra lava yimbelelaka hi tiharipa loko va ba tiharipa ta vona.

³ A va yimbelela risimu lerintshwa emahlweni ka xiluvelo, ni le mahlweni ka swivumbiwa leswi hanyaka swa mune, ni le mahlweni ka vakulukumba, kutani a ku nga ri na munhu la swi kotaka du dyondza risimu lero, loko va nga ri lava 144 000 lava kutsuriweke emisaveni.

⁴ Hi lava nga tinyamisangiki hi vavasati, hikuva va tengile; hi lava landzaka Xinyimpfana hinkwako laha xi yaka kona; va kutsuriwile exikarhi ka vanhu leswaku swi va swirhangana eka Xikwembu ni ka Xinyimpfana.

⁵ Mavunwa a ma kumiwangi emilon'wini ya vona, hikuva va pfumale xivati.

Tintsumi letinharhu leti vulaka ku avanyisa.

⁶ Kutani ndzi vona ntsumi yin'wana leyi hahaka exikarhi ka tilo, yi tamele Evhangeli leyi nga riki na ku hela, ku yi dyondzisa lava akeke emisaveni, va ri va matiko hinkwawo, ni tinxaka hinkwato, ni swivongo hinkwaswo,

⁷ yi vula hi rito leri tlakukeke yi ku: “Chavani Xikwembu mi xi dzunisa, hikuva nkarhi wa ku avanyisa ka xona wu fikile; khinsamelani la endleke tilo ni misava, ni lwandle, ni swihlovo swa mati.”

⁸ Kutani ntsumi yin'wana ya vumbirhi yi ku: “U wile, u wile, Babilona, muti lowukulu, hikuva u nwisile matiko hinkwawo vhinyo ya vukari bya vuoswi bya yena.”

⁹ Kambe ntsumi ya vunharhu yi ti landzela, yi vula hi rito leri tlakukeke yi ku: “Kungakuloko munhu a khongela xivandza ni xifaniso xa xona, a teka ni mfungho emombyeni wa yena, kumbe evokweni ra yena,

¹⁰ na yena u ta nwa vhinyo ya vukari bya Xikwembu, leyi cheriweke yi nga hlanganisiwanga exinwelweni xa ku kariha ka xona; kutani u ta xanisiwa endzilweni ni le xivavuleni, emahlweni ka tintsumi leto kwetsima, ni le mahlweni ka Xinyimpfana.

¹¹ Musi wa ku xaniseka ka vona wu mbuluka hi masiku ni masiku, kutani lava gandzelaka xivandza ni xifaniso xa swona, va nga ka va nga kumi ku wisa vusiku ni nhlekanhi, hambi va ri lava amukeleke mfungho wa vito ra xona.”

¹² Hilaha ku nga kona ku tiyisela ka vakwetsimi, va nga lava hlayisaka ku lerisa ka Xikwembu, ni ku pfumela eka Yesu.

¹³ Kutani ndzi twa rito leri humaka etilweni, ri ku: “Tsala: Ku katekile vafi lava felaka eHosini, ku sungula sweswi!” Moya wu ri: “Ina, leswaku va phyuphya emitirhweni ya vona, hikuva mitirho ya vona ya va landzela.”

Ku tshovela.

¹⁴ Kavaloko ndzi languta, kutani vonani, a ku ri ni papa lero basa epapeni, ku tshamile un'wana la fanaka ni N'wana wa Munhu, a rhwele enhlokweni harhi ya nsuku, a tamele rihwevo lero kariha evokweni ra yena.

¹⁵ Kutani ntsumi yin'wana yi huma etempeleni, yi huwelela hi rito leri tlakukeke eka la tshameke epapeni, yi ku: “Hoxa rihwevo ra wena u tshovela, hikuva nkarhi wa ku tshovela wu fikile, hikuva mavele ya misava ma vupfile.”

¹⁶ Kutani la tshameke epapeni a hoxa rihwevo ra yena emisaveni, kutani misava yi tshoveriwa.

¹⁷ Ntsumi yin'wana yi huma etempeleni ya le tilweni, yi tamele, na yona, rihwevo lero kariha.

¹⁸ Kutani ntsumi yin'wana yi huma ealitarini, yi ri ni matimba henhla ka ndzilo; kutani yi huwelela hi rito lerikulu eka loyi a tameleke rihwevo lero kariha, yi ku: “Hoxa rihwevo ra wena ro kariha, u kha mihandzu ya vhinya ya misava hikuva mihandzu ya yona yi vupfile.”

¹⁹ Kavaloko ntsumi yi hoxa rihwevo ra yona emisaveni, yi tshovela vhinya ya misava, kutani yi hoxa mihandzu leyi tshoveriweke exikhuvutweni lexikulu xa vukari bya Xikwembu.

²⁰ Kutani xikhuvuto xi khuvuteriwa ehandle ka muti; ku huma ngati exikhuvutweni ku fikela ematon'weni ya tihanci, hi mpfhuka wa tistadiya ta 1 600.