Nehemiya 6 - Xitsonga (Bibele)

Ta valala va Nehemiya.

¹ Sanibalati, na Tobiya, na Gexeme, Muarabu, ni lava seleke va valala va hina, kuteloko va twile leswaku ndzi pfuxile rirhangu, ni leswaku a ka ha ri na laha ngi ri mbundzuxiwile, hambi ndzi nga si vehela timbanti ta tinyangwa ku fikela enkarhini wolowo,

² Sanibalati na Gexeme va rhumela eka mina, va ku: “Tana, hi hlangana na wena emitini leyi nga enkoveni wa Ono,” kasi a va kanerile ku ndzi humesela khombo.

³ Ndzi va rhumela tintsumi, ndzi ku: “Ndzi khomiwile hi mitirho leyikulu, ndza tsandzeka ku ngirimela; ndzi nga yimisela yini mitirho ku yi siya ndzi ta eka n'wina xana?”

⁴ Va ndzi rhumela mhaka yoleyo ka mune, na mina ndzi va hlamula rito rin'we.

⁵ Hi loko Sanibalati a tlhela a rhuma mhaka yoleyo ra vuntlhanu hi nandza wa yena, a ta a tamele papila leri phurunuriweke evokweni ra yena,

⁶ leri ku tsariweke eka rona mhaka leyi nge: “Ku twakele exikarhi ka matiko, na yena Gexeme u vula sweswo leswaku wena ni Vayuda mi kanele makungu ya ku xandzuka, hikwalaho mi pfuxaka rirhangu; mavunwa ma ri hi wena u nga ta va hosi ya vona.

⁷ U vekile ni vaprofeta ku vula eYerusalema leswaku u hosi ya Vayuda. Sweswi mhaka yoleyo yi ta byeriwa hosi, loko swi ri tano, tana hi ta kanela kun'we.”

⁸ Kutani ndzi rhumela eka yena, ndzi ku: “A ku na mhaka ni yin'we ya leti u ti vulavulaka, u lo sungula embilwini ya wena ntsena.”

⁹ Hikuva hinkwavo a va lava ku hi chavisa, va ku: “Mavoko ya vona ma ta hela matimba leswaku ntirho wu nga yi emahlweni.” Oho Xikwembu xanga! Sweswi wa nga tiyisa mavoko ya mina!

¹⁰ Kutani ndzi nghena endlwini ya Xemaya, n'wana Delaya, n'wana Mehetabele (a a tipfalele kona); a ku eka mina: “A hi hlengeletaneni endlwini ya Xikwembu, endzeni ka tempele, hi pfala timbanti ta tempele, hikuva va ta ta ku dlaya; hi vusiku lebyi, va ta ku dlaya.”

¹¹ Ndzi ku: “Xana munhu wo kota mina a nga baleka xana? U kwihi munhu loyi a kotaka mina la nga nghenaka etempeleni leswaku a ta hanya? Ndzi nga ka ndzi nga ngheni kona.”

¹² Ndzi vona leswaku Xikwembu a xi n'wi rhumanga, kambe u vurile vuprofeta lebyi ku ndzi pfuka, hikuva Tobiya na Sanibalati a va n'wi hakela.

¹³ Leswi va nga n'wi hakelelaka swona hileswaku ndzi chava ndzi dyoha hi ku endla sweswo va ta kuma leswi va nga ta onha vito ra mina ha swona hi ku ndzi hembela.

¹⁴ Oho Xikwembu xa mina! Anakanya Tobiya na Sanibalati, ni ku endla ka vona! Na yena Nowadiya, muprofeta wa wansati, ni vaprofeta van'wana lava laveke ku ndzi chavisa!

¹⁵ Loko ri ri rirhangu, ri hela hi siku ra makume mambirhi na ntlhanu ra n'hweti ya Elulu, ri tirhiwile hi masiku ya 52.

¹⁶ Kuteloko valala hinkwavo va hina va swi twa, va matiko hinkwawo lama hi rhendzeleke va tshuka, va pfimba timbilu, va chava hi ku vona leswaku mitirho yoleyo yi endliwile hi Xikwembu xa hina.

¹⁷ Kambe enkarhini wolowo a ku ri ni vakulukumba van'wana va Vayuda lava nga rhumela mapapila layo tala eka Tobiya, va tlhela va kuma mapapila ya Tobiya.

¹⁸ Hikuva a ku ri ni vanhu lavo tala va Vayuda lava ngi va hlanganile na yena hi ku hlambanya; hikuva a a ri mukon'wana wa Xekaniya, n'wana Ara, kutani n'wana wa yena Yohanani, a a tekile n'wana Mexulama n'wana Berekiya;

¹⁹ kambe a va n'wi vula hi timhaka letinene emahlweni ka mina, a va n'wi hlevela ku vulavula ka mina. Kambe Tobiya a a rhuma mapapila ku ndzi chavisa.