Nehemiya 11 - Xitsonga (Bibele)

Ta vanhu va tiko loko va byeriwa miti leyi va nga ta aka eka yona.

¹ Tihosana ta tiko, tona, a ti akile eYerusalema; loko va ri van'wana va tiko va hlawuriwa hi vuhlolotwana leswaku exikarhi ka lava khume, un'wana a ta aka eYerusalema, emutini lowo kwetsima, lava ntlhanu na mune va aka emitini.

² Tiko ri katekisa vanhu hinkwavo lava tilangeleke ha voxe ku aka eYerusalema.

³ Hi lava vakulukumba va matlhelo lava tshamaka va aka Yerusalema, ni le mitini ya Yuda; Vaisraele, ni vaprista, ni Valevhi, ni Vanetinimi, ni vana va malandza ya Solomoni, va aka un'wana ni un'wana etikweni leri a ri fumeke, emutini wa yena.

⁴ Lava akeke eYerusalema, hi lava: Vana va Yuda ni vana va Benjamini; vana va Yuda, a ri Ataya, n'wana Uziya, n'wana Zakariya, n'wana Amariya, n'wana Xefatiya, n'wana Mahalalele wa vana va Perese;

⁵ na Maaseya, n'wana Baruku, n'wana Kolo-Hoze, n'wana Hazaya, n'wana Adaya, n'wana Yoyaribi, n'wana Zakariya, n'wana Xiloni.

⁶ Hinkwavo vana va Perese lava akeke eYerusalema, a va ri vavanuna va matimba va 468.

⁷ Vana va Benjamini hi lava: Salu, n'wana Mexulama, n'wana Yowede, n'wana Pedaya, n'wana Kolaya, n'wana Maaseya, n'wana Itiele, n'wana Yexaya.

⁸ Endzhaku ka yena a a ri Gabayi, na Salayi, va ri vavanuna va 928.

⁹ Na Yuwele, n'wana Zikri, a vekiwa mukamberi wa vona, Yuda, n'wana Hasenuwa, yena a vekiwa mukamberi wa vumbirhi emutini.

¹⁰ Exikarhi ka vaprista, a va Yedaya, n'wana Yoyaribi, na Yakini,

¹¹ na Seraya, n'wana Hilkiya, n'wana Mexulama, n'wana Sadoki, n'wana Merayoto, n'wana Ahituba, murisi wa yindlu ya Xikwembu,

¹² swin'we ni vamakwavo lava nga tirha mitirho ya yindlu va ri vavanuna va 822, na Adaya, n'wana Yerohama, n'wana Pelaliya, n'wana Amisi, n'wana Zakariya, n'wana Paxahuru, n'wana Malikiya,

¹³ ni vamakwavo ti nga tihosana ta tindlu ta vatata wa vona, va nga vavanuna va 242, na Amaxayi, n'wana Asarele, n'wana Ahazayi, n'wana Mexilemoto, n'wana Imere,

¹⁴ ni vamakwavo, ti ri tinhenha, va ri 128; ndhuna ya vona a a ri Zabadiele, n'wana Hagedolimi.

¹⁵ Eka Valevhi, a a ri Xemaya, n'wana Haxuba, n'wana Azirikama, n'wana Haxabiya, n'wana Buni,

¹⁶ na Xabetayi, na Yozabadi, a va ri vakamberi va mitirho ya le handle ka yindlu ya Xikwembu, a va ri van'wana va tihosana ta Valevhi,

¹⁷ na Mataniya, n'wana Mikaya, n'wana Zabidi, n'wana Asafa, loyi a nga suma tinsimu ta xikhongelo, exikarhi ka vamakwavo a a ri Bakibukiya na Abida, n'wana Xamuwa, n'wana Galala, n'wana Yedutuni.

¹⁸ Hinkwavo Valevhi lava akeke emutini lowo kwetsima, a va ri 284.

¹⁹ Eka valanguteri va tinyangwa, a a ri Akubu na Talimoni, ni vamakwavo lava nga languta tinyangwa va endla 172.

²⁰ Van'wana Vaisraele ni vaprista, ni Valevhi, a va akile emitini hinkwayo ya Yuda, un'wana ni un'wana endzhakeni ya yena.

²¹ Vanetinimi, vona, a va akile eOfele; Siha na Gixipa a va ri vakamberi va Vanetinimi.

²² Mukamberi wa Valevhi eYerusalema, a a ri Uzi, n'wana Bani, n'wana Haxabiya n'wana Mataniya, n'wana Mikaya, wa vana va Asafa; valavo i vayimbeleri lava tirhaka mitirho ya yindlu ya Xikwembu;

²³ hikuva hosi a yi lerisile mitirho ya vona, ni leswaku hakelo leyi vuriweke yi nyikiwa vayimbeleri hi siku rin'wana ni rin'wana.

²⁴ Petahiya, n'wana Mexezabele, wa vana va Zera, n'wana Yuda, a a vekiwile hi hosi ku lunghisa timhaka hinkwato ta tiko.

²⁵ Loko yi ri miti ni masimu ya kona, vana va Yuda van'wana va akile eKiriyata-Araba ni miti ya kona, na Diboni ni miti ya kona, na Yekabiele ni miti ya kona,

²⁶ na Yexuwa, na Molada, na Beta-Pelete,

²⁷ na Hasari-Xuwala, na Berexeba ni miti ya kona,

²⁸ na Sikilaga, na Mekona ni miti ya kona,

²⁹ na Eni-Rimoni, na Sora, na Yaramutu,

³⁰ na Zanowaka, na Adulama ni miti ya kona, na Lakixi, ni masimu ya kona, na Azeka ni miti ya kona, va aka ku suka eBerexeba ku fika enkoveni wa Hinomu.

³¹ Loko va ri vana va Benjamini, va ake ku sukela eGeba na Mikamaxa, na Aya, na Betele ni le mitini ya kona,

³² na Anatoto, na Nobo, na Ananiya,

³³ na Hasoro, na Rhama, na Gitayimi,

³⁴ na Hadidi, na Seboyimi, na Nebalata,

³⁵ na Lodo, na Ono, enkoveni wa vavatli.

³⁶ Valevhi van'wana va ku avanyisa ka Yuda, va aka exikarhi ka va Benjamini.