Matewu 5 - Xitsonga (Bibele)

Ta Yesu loko a dyondzisa entshaveni.

¹ Kutani Yesu, loko a vona mitshungu, a tlhandlukela entshaveni; kuteloko a tshamile, vadyondzisiwa va yena va n'wi tshinelela.

² Kutani a ahlamisa nomu wa yena, a va dyondzisa a ku:

Mikateko.

³ “Ku katekile swisiwana emoyeni, hikuva ku fuma ka matilo i ka swona.

⁴ Ku katekile lava rilaka, hikuva va ta chaveleriwa.

⁵ Ku katekile lavo rhula, hikuva va ta dya ndzhaka ya misava.

⁶ Ku katekile lava nga ni ndlala ni torha ra leswo lulama, hikuva va ta xurha.

⁷ Ku katekile vona va tintswalo, hikuva va ta tweriwa vusiwana.

⁸ Ku katekile lava nga ni timbilu leti tengeke, hikuva va ta vona Xikwembu.

⁹ Ku katekile lava lamulaka, hikuva va ta thyiwa vana va Xikwembu.

¹⁰ Ku katekile lava xanisiwaka hikwalaho ka ku lulama, hikuva ku fuma ka matilo i ka vona.

¹¹ Mi ta kateka loko va mi rhuketela hikwalaho ka mina, loko va mi lumbeta hi mavunwa layo tala.

¹² Tsakani, mi tsaka ngopfu hikuva hakelo ya n'wina i yikulu ematilweni, hikuva va xanisile sweswo vaprofeta lavo rhanga.

Ta munyu wa misava, ni ku vonakala ka misava.

¹³ “Mi munyu wa misava; kambe loko munyu wu phyama, wu ta lungiwa ha yini-ke? A wa ha ri na ntirho loko ku nga ri ku cukumetiwa ehandle, wu kandziyiwa hi vanhu.

¹⁴ “Mi ku vonakala ka misava; muti lowu nga ehenhla ka ntshava a wu tumberi.

¹⁵ Rivoningo, na rona, a ri lumekiwi ku nghenisiwa ehansi ka xirhundzu, kambe ri tlhomiwa ehenhla, ri voninga hinkwavo lava nga endlwini.

¹⁶ Ku vonakala ka n'wina a ku voningise vanhu sweswo, va ta vona mitirho ya n'wina leyo saseka, va dzunisa Tata wa n'wina la nga etilweni.

Ku hetisisa ka milawu ni ka vaprofeta.

¹⁷ “Mi nga tshuki mi anakanya leswaku ndzi tile ku herisa nawu, hambi va ri vaprofeta; a ndzi tanga ku ta herisa ndzi tile ku ta hetisisa.

¹⁸ Hikuva kunene, ndza mi byela, ndzi ri: Tilo ni misava swi ko swi hundza, yota, hambi yi ri yin'we, ni valanyana, hambi ri ri rin'we ra nawu, swi nga ka swi nga hundzi ku nga si endleka swilo hinkwaswo.

¹⁹ Hikwalaho la tlulaka wun'wanyana wa milawu leyitsongo leyi, kutani a dyondzisa vanhu ku endlisa sweswo, u ta vuriwa lontsongo eku fumeni ka matilo. Kambe la hlayiseke nawu kutani a wu dyondzisa, u ta vuriwa lonkulu eku fumeni ka matilo.

²⁰ Hikuva ndza mi byela, ndzi ri: Ku lulama ka n'wina loko ku nga tluri ka vatsari ni Vafarisi, mi nga ka mi nga ngheni eku fumeni ka matilo.

²¹ “Mi swi twile leswi vuriweke eka lava khale, va te: ‘U nga tshuki u dlaya; la dlayaka u ta fanela ku avanyisiwa!’

²² Kambe mina ndzi ri eka n'wina: Munhu hambi a ri mani na mani, la karihelaka makwavo ntsena u ta fanela ku avanyisiwa; la vulaka makwavo xihunguki, u fanele ku avanyisiwa hi nhlengeletano; la nge eka yena: ‘U ni rihuhu,’ u fanele hi ndzilo wa tihele.

²³ Hikwalaho, loko u humesa mhamba ya wena ealitarini, kutani u ehleketa kona leswaku makwenu u ni mhaka na wena,

²⁴ siya mhamba ya wena kwala emahlweni ka alitari, kutani famba u rhanga u ya hlangana ni makwenu; hi kona u nga ta humesa mhamba ya wena.

²⁵ “Hatlisa u pfumelelana ni la tengisanaka na wena wa ha ri endleleni na yena, leswaku loyi u tengisanaka na yena a nga ti ku nyiketa eka muavanyisi, kutani yena a ku nyiketa phorisa, kutani rona ri ku nghenisa ekhotsweni.

²⁶ Ndza ku byela swinene leswaku u nga ka u nga humi kona u nga si riha mali hinkwayo.

²⁷ “Mi swi twile leswaku ku vuriwile va te: ‘U nga tshuki u endla vuoswi.’

²⁸ Kambe mina ndzi ri eka n'wina: Munhu, hambi a nga va mani na mani, la langutaka wansati ku n'wi navela, u n'wi oswile embilwini ya yena.

²⁹ “Kungakuloko tihlo ra wena ra xinene ri ku khunguvanyisa, ri xokole, u ri cukumeta ekule na wena; hikuva swi nga saseka eka wena loko xirho xa wena xi lova xi ri xin'we ntsena, miri wa wena hinkwawo wu nga cukumetiwi etiheleni.

³⁰ Loko voko ra wena ra xinene ri ku khunguvanyisa, ri tseme, u ri cukumeta ekule na wena, hikuva swi nga saseka eka wena loko xirho xa wena xi lova xi ri xin'we ntsena, miri wa wena hinkwawo wu nga cukumetiwi etiheleni.

³¹ “Ku vuriwile kambe va te: ‘Loko munhu a tshika nsati wa yena, a a n'wi nyike tsalwa ra ku n'wi tshika.’

³² Kambe mina ndzi ri eka n'wina: Munhu, hambi a ri mani na mani, la tshikaka nsati wa yena, loko ku nga ri hi mhaka ya vuoswi, a n'wi endla leswaku a hundzuka muoswi; kutani un'wana ni un'wana la tekaka loyi a tshikiweke, u ni vuoswi.

³³ “Kambe mi swi twile leswi vuriweke eka lava khale, va te: ‘U nga tshuki u hundzuka eku hlambanyeni ka wena, kambe tlherisela eka Hosi leswi u yi hlambanyeleke swona.’

³⁴ Kambe mina ndzi ri eka n'wina: Mi nga tshuki mi hlambanya, ni ku ringa, hambi ku ri hi tilo, hikuva i xiluvelo xa Xikwembu,

³⁵ hambi ku ri hi misava, hikuva i vunavelo bya milenge ya xona, hambi ku ri hi Yerusalema, hikuva i muti wa Hosi leyikulu.

³⁶ “Kambe u nga tshuki u hlambanya hi nhloko ya wena, hikuva nsisi, ni loko wu ri wun'we, u nga hluleka ku wu hundzula lowo basa, ni ku wu endla ntima.

³⁷ Kambe ku vulavula ka n'wina a ku ve: ‘Ina, ina’; ‘E-e, e-e’; leswi u swi engetakela swi huma eka lowo biha.

³⁸ “Mi swi twile leswaku ku vuriwile va te: ‘Tihlo ri rihisiwa hi tihlo, tino hi tino.’

³⁹ Kambe mina ndzi ri eka n'wina: Mi nga tshuki mi alela la mi endlaka swo biha; kambe loko munhu a ku phakata rhama ra xinene, u n'wi hundzukela ni rin'wana.

⁴⁰ Ni loko munhu a rhandza ku ku tengisa ni ku ku tekela baji, u n'wi tshika na rona jasi.

⁴¹ Loko munhu a ku sindzisa leswaku u famba na yena mpfhuka wun'we, famba mimpfhuka mimbirhi.

⁴² Nyika la kombelaka ka wena, u nga fularheli la rhandzaka ku kombela eka wena.

⁴³ “Mi swi twile leswaku ku vuriwile va te: ‘Rhandza warikwenu u venga la nga nala eka wena.’

⁴⁴ Kambe mina ndzi ri eka n'wina: Rhandzani lava nga valala eka n'wina; mi katekisa lava mi rhukanaka; lava mi vengaka mi va endla swinene; mi khongelela lava mi xanisaka;

⁴⁵ hileswaku mi hundzuka vana va Tata wa n'wina la nga ematilweni, hikuva u tsuvukisa dyambu ra yena ehenhla ka lavo biha ni lavo saseka, u nisa mpfula ehenhla ka lavo lulama ni lavo homboloka.

⁴⁶ Hikuva loko mi rhandza lava mi rhandzaka, mi nga va ni ku hakela kwihi? Na vona valuvisi a va endlisi sweswo xana?

⁴⁷ Loko mi xewetana ni vamakwenu ntsena, mi nga tlula van'wana ha yini? Vamatiko, na vona, a va endlisi sweswo xana?

⁴⁸ Sweswo-ke, na n'wina, mi hamba mi hetiseka, kukotisa Tata wa n'wina la nga etilweni a hetisekeke.