Matewu 28 - Xitsonga (Bibele)

Ta ku pfuka ka Yesu.

¹ Eku heteleleni ka Savata, hi siku ro sungula ra vhiki, loko ri tsuvuka, Mariya wa Magadala, na Mariya lo un'wana va ya languta sirha.

² Kutani ku tsekatseka lokukulu ka misava ku va kona, hikuva ntsumi ya Hosi a yi xikile hi le tilweni, yi ta vumbuluxa ribye enyangweni ya sirha, yi tshamisa ehenhla ka rona.

³ Mombo wa yona a wu kotisa rihati, ni tinguvu ta yona a ti ri leto basa kukotisa gamboko.

⁴ Kutani valanguteri va rhurhumela hi ku chava, va hundzuka swa nga hi vafi.

⁵ Ntsumi yi vulavula yi ku eka vavasati: “Loko mi ri n'wina mi nga chaveni, hikuva ndza swi tiva leswaku mi lava Yesu loyi ngi a vambiwile;

⁶ a nga kona la, hikuva u pfukile hilaha a tshameke a mi byela. Tanani mi ta vona byetlelo bya yena,

⁷ mi ta hatlisa mi ya byela vadyondzisiwa va yena leswaku u pfukile eku feni; kutani maswivo, u ta mi rhangela emahlweni eGaleliya, mi ta n'wi vona kona; hi sweswo, ndzi mi byerile.”

⁸ Kutani va hatlisa va huma esirheni hi ku chava ni ku tsaka lokukulu, va tsutsuma va ya byela vadyondzisiwa va yena.

⁹ Va ko va ha ya va byela, va vona Yesu a va hlangaveta, a ku: “Avuxeni!” Kutani va tshinela, va khoma milenge ya yena, va n'wi khinsamela.

¹⁰ Yesu a ku eka vona: “Mi nga chaveni, yanani, mi ya byela vamakwerhu leswaku va ya eGaleliya, hi kona va nga ta ndzi vona.”

¹¹ Kuteloko va sukile, valanguteri van'wana va ya emutini, va ya byela vaprista lavakulu hinkwaswo leswi humeleleke.

¹² Kuteloko vaprista va hlengeletanile ni vakulukumba, va kanela makungu, va nyika masocha mali leyo tala, va ku:

¹³ “Mi nge: ‘Vadyondzisiwa va yena va tile nivusiku, va n'wi yiva hi etlele.’

¹⁴ Kutani, hambi hosi yi twa mhaka yoleyo hina hi ta yi khorwisa, hi mi sirheleta.”

¹⁵ Valanguteri va teka mali, va endla hilaha va lerisiweke hakona; kutani mhaka yoleyo yi twakarile exikarhi ka Vayuda ni namuntlha.

¹⁶ Kutani vadyondzisiwa lava khume na un'we va ya eGaleliya, entshaveni leyi va yi lerisiweke hi Yesu.

¹⁷ Kuteloko va n'wi vonile va n'wi khinsamela, kambe van'wana va vilela.

¹⁸ Kutani Yesu a va tshinelela a vulavula na vona, a ku: “Ndzi nyikiwile vuhosi hinkwabyo etilweni ni le misaveni;

¹⁹ yanani hakona mi ya dyondzisa va matiko hinkwawo, mi va khuvula hi vito ra Tatana, ni ra N'wana ni ra Moya lowo Kwetsima,

²⁰ mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n'wina hi masiku hinkwawo, ku ko ku hela misava.”