Matewu 18 - Xitsonga (Bibele)

Ta ku fana ni vana, ni ku khunguvanyisa vana.

¹ Enkarhini wolowo, vadyondzisiwa va ta eka Yesu, va ku eka yena: “Lonkulu eku fumeni ka Xikwembu i mani xana?”

² Yesu a vitana n'wana, a n'wi veka exikarhi ka vona, a ku.

³ “Ndza vurisa, ndzi ri eka n'wina: Loko mi nga hundzuki, mi fana ni vana, mi nga ka mi nga ngheni eku fumeni ka matilo.

⁴ Hikwalaho un'wana ni un'wana la titsongahataka kukotisa n'wana loyi, hi yena la nga lonkulu eku fumeni ka matilo.

⁵ Kambe un'wana ni un'wana la amukelaka n'wana kukotisa loyi hi vito ra mina, u rhurhela mina.

⁶ Kambe un'wana ni un'wana la khunguvanyisaka un'wana wa lavatsongo, lava pfumelaka ka mina, a swi ta va swona eka yena loko a boheleriwa ribye ra ku sila enhan'wini, a hoxiwa exidziveni xa lwandle.

⁷ “Yi ni khombo misava hikwalaho ka ku khunguvanyisa; hikuva ku khunguvanyisa ku fanele ku va kona kambe u ni khombo munhu loyi ku khunguvanyeka ku humelelaka ha yena.

⁸ Kambe voko ra wena, kumbe nenge loko swi ku wisa, swi tseme u swi cukumeta ekule na wena, hikuva i mhaka leyi ku fanelaka ku nghena evutomini, u ri xilema, kumbe u khwita, ku nga ri ku cukumetiwa endzilweni lowu nga timekiki, u ri ni milenge mimbirhi, kumbe mavoko mambirhi.

⁹ Loko tihlo ra wena ri ku wisa, ri xokole, u ri cukumeta ekule na wena; hikuva i mhaka leyi ku fanelaka ku nghena evutomini u ri ni tihlo rin'we, ku nga ri ku cukumetiwa etiheleni ta ndzilo, u ri ni mahlo mambirhi.

¹⁰ “Tilanguteleni, mi nga tshuki mi sola un'wana wa lavatsongo lava hikuva ndzi ri eka n'wina, tintsumi ta vona ematilweni ti languta hi masiku mombo wa Tatana la nga ematilweni.

¹¹ Hikuva N'wana wa Munhu u tile ku ta hanyisa leswi loveke.

¹² “Xana mhaka leyi yi ri yini ka n'wina? Loko munhu a ri ni tinyimpfu ta dzana, kutani yin'we ya tona yi lahlekile, a nga ka a nga siyi leta ntlhanu wa makume, na mune wa makume, na ntlhanu na mune, a ya lava leyi lahlekeke xana?

¹³ Kutani loko a tshuka a yi kuma, ndzi ri eka n'wina, u ta yi tsakela hi ku tsaka loku tlurisaka loku a nga tsakelaka leta ntlhanu wa makume, na mune wa makume, na ntlhanu na mune leti nga ka ti nga lahlekanga.

¹⁴ Kutani sweswi, a hi ku rhandza ka tata wa n'wina la nga ematilweni, leswaku un'wana wa lavatsongo lava a ya eku lahlekeni.

Ta ku rivalela milandzu.

¹⁵ “Loko makwenu a dyohile, yana u n'wi laya mi le swenu; loko a ku yingisa, u ta va u kumile makwenu.

¹⁶ Kambe loko a nga ku yingisi, yana ni un'wana, hambi va ri vambirhi; leswaku ku vulavula hinkwako ku tiyisiwa hi milomu ya timbhoni timbirhi kumbe tinharhu.

¹⁷ Kuteloko a nga va yingisi, byela nhlengeletano; loko a nga yingisi nhlengeletano, eka wena a a kotise muhedeni ni muluvisi.

¹⁸ Kunene ndzi ri eka n'wina: Hinkwaswo leswi mi nga ta swi tsimba la emisaveni swi ta tsimbiwa ni le tilweni; ni hinkwaswo leswi mi nga ta swi tshunxa la emisaveni, swi ta tshunxiwa netilweni.

¹⁹ Kambe ndzi ri eka n'wina, vambirhi eka n'wina, loko va pfumelelana laha emisaveni, swilo hinkwaswo leswi va swi kombelaka, va ta nyikiwa hi Tatana wa le tilweni.

²⁰ Hikuva laha vambirhi, kumbe vanharhu va hlengeletanaka kona hi vito ra mina, ndzi kona exikarhi ka vona.”

²¹ Hilaha Petro a n'wi tshinelelaka, a ku: “Hosi, makwerhu loko a ri karhi a ndzi dyohela, ndzi ta n'wi rivalela kangani xana? Ku ta va kantlhanu na kambirhi xana?”

²² Yesu a ku eka yena: “Ndzi ri eka wena, ku nga vi kantlhanu na kambirhi, kambe a ku ve ka makume ya ntlhanu na makume mambirhi, lama hlayiwaka eka ntlhanu na kambirhi.

²³ “Hikwalaho ku fuma ka le tilweni ku fana ni hosi leyi rhandzeke ku kambela malandza ya yona.

²⁴ Kuteloko a sungule ku hlaya, ku tisiwa ka yena un'wana la nga ni nandzu wa titalenta ta dzana ra madzana;

²⁵ kambe, hikuva a pfumale lexi a nga rihaka ha xona, hosi ya yena yi lerisa leswaku a a xavisiwe ni nsati wa yena, ni vana va yena, ni hinkwaswo leswi a nga na swona, nandzu wu ko wu hela.

²⁶ Kambe nandza yeloyi a khinsama, a khongela, a ku: ‘Hosi, wanga ndzi lehisela mbilu, ndzi ta ku rihela hinkwaswo.’

²⁷ Kutani hosi ya nandza loyi yi n'wi rivalela nandzu.

²⁸ Kambe nandza loyi, loko a huma ehandle, a hlangana ni nandzakulobye loyi ngi a ri ni nandzu eka yena wa tidenari ta dzana; kavaloko a n'wi khoma, a n'wi kametela, a ku: ‘Riha nandzu wa wena!’

²⁹ Nakulobye a wa emilengeni ya yena, a n'wi khongela, a ku: ‘Ndzi rhutelele, ndzi ta ku rihela hinkwaswo.’

³⁰ Yeloyi a ala, a ya n'wi susumetela ekhotsweni, a kondza a riha nandzu wa yena hinkwawo.

³¹ Kutani vanakulobye va malandza, loko va vona leswi endliweke, va khomiwa hi tingana ngopfu, va ya byela hosi ya vona hinkwaswo leswi endliweke.

³² Kavaloko hosi yi vita nandza loyi, yi ku eka yena: ‘Nandza wa mona, a ndzi ku tshikele nandzu wa wena hinkwawo, hikuva u ndzi khongele;

³³ xana a swi nga ku faneri, na wena, ku tsetselela nakuloni kukotisa leswi ndzi nga, ku tsetselela xana?’

³⁴ Kutani hosi ya yena yi n'wi karihela yi n'wi nyika maphorisa a kondza a riha nandzu wa yena hinkwawo.

³⁵ Mi ta endlisiwa sweswo hi Tatana wa le tilweni, loko un'wana ni un'wana wa n'wina a nga rivaleli makwavo ku dyoha ka yena hi mbilu hinkwayo ya yena.”