Matewu 14 - Xitsonga (Bibele)

Ta rifu ra Yohane Mukhuvuri.

¹ Enkarhini wolowo, Heroda Mutetrarka, kuteloko a yingisile mpfumawulo wa Yesu,

² a ku eka malandza ya yena: “Yeloyi i Yohane Mukhuvuri, u pfukile eku feni; hikwalaho matimba ya mahlori ma tirha hi yena.”

³ Hikuva Heroda a a khomile Yohane a n'wi boha, a n'wi hoxa ekhotsweni hikwalaho ka Herodiya, nsati wa Filipi, ndzisana ya yena;

⁴ hikuva Yohane a a ku eka yena: “A swi ku lulamelanga leswaku u n'wi teka.”

⁵ Kutani a a rhandza ku n'wi dlaya, kambe a chava vanhu hikuva a va ku, i muprofeta.

⁶ Kambe enkhubyeni wa siku ra ku tswariwa ka Heroda, n'wana Herodiya wa wanhwana a cina emahlweni ka vanhu a tsakisa Heroda;

⁷ kutani kwalaho a n'wi hlambanyela hi ku tiyisa a ku eka yena: “Ndzi ta ku nyika leswi u nga ta swi kombela, hambi yi va yini na yini.”

⁸ Kutani lo wanhwana, loko a susumetiwa hi mana wa yena, a ku: “Ndzi nyike sweswi enkambaneni nhloko ya Yohane Mukhuvuri.”

⁹ Kutani hosi yi khomiwa hi tingana; kambe leswi a hlambanyeke, ni hikwalaho ka lava tshameke eswakudyeni na yena, a lerisa leswaku a nyikiwa yona,

¹⁰ a rhuma vanhu va ya tsema nhloko ya Yohane ekhotsweni.

¹¹ Kutani nhloko ya yena yi nehiwa enkambaneni, va nyika wanhwana; yena a yi yisa eka mana wa yena.

¹² Kutani vadyondzisiwa va Yohane va ta teka ntsumbu wa yena, va wu lahla; va ya byela Yesu.

Ta mahlori ya swinkwa.

¹³ Yesu loko a twile timhaka leti, a suka kwalaho hi byatso, a ya emananga, etlhelweni. Kuteloko ntshungu wu swi twile, wu n'wi landzela kona hi milenge, wu huma emitini.

¹⁴ Yesu, kakuloko a huma, a vona mitshungu leyikulu, a va twela vusiwana, a hanyisa lava vabyaka exikarhi ka vona.

¹⁵ Kute nimadyambu, vadyondzisiwa va yena va n'wi tshinelela, va ku: “Laha i mananga, ni dyambu ri perile, tlherisa mitshungu, va tiyela emitini va tixavela swakudya.”

¹⁶ Kambe Yesu a ku eka vona: “A va fanelanga ku suka, va fihluteni mi ri n'wina.”

¹⁷ Va ku eka yena: “A hi na nchumu la, loko swi nga ri swinkwa swa ntlhanu ntsena, ni tinhlampfi timbirhi.”

¹⁸ A ku: “Ndzi tiseleni swona la.”

¹⁹ Kuteloko a va lerisile ku tshamisisa vunyingi ehansi, ebyanyini, a teka swinkwa leswa ntlhanu, ni tinhlampfi timbirhi, a langutisa henhla, a khensa. Kutani a phema swinkwa a nyika vadyondzisiwa va yena, kutani vadyondzisiwa va avela ntshungu.

²⁰ Kutani va dya hinkwavo, va xurha; kambe ku tekiwa mahlanhla lama nga sala, ma tata swirhundzu swa khume na swimbirhi.

²¹ Kambe lava dyeke a va ri vanhu lava lavaka ku va ntlhanu wa makume ya madzana, vavasati ni vana va nga hlayiwi.

Ta Yesu loko a famba ehenhla ka mati.

²² Kutani Yesu a sindzisa vadyondzisiwa va yena leswaku va nghena ebyatsweni, va n'wi rhangela, va pelela entsungeni wa hase, loko yena a ri karhi a tlherisa mitshungu.

²³ Kuteloko a tlherisile mitshungu, a tlhandlukela entshaveni ku ya khongela hitlhelo; kutani a peleriwa hi dyambu a ha ri kwalaho a le swakwe.

²⁴ Byatso, byona, a byi ri exikarhi ka lwandle, byi tsekatsekisiwa hi magandlati ya lwandle, hikuva moya a wu va alela.

²⁵ Kambe hi nkarhi wa vumune wa vusiku, Yesu a ta eka vona, a famba ehenhla ka mati.

²⁶ Kakuloko vadyondzisiwa va n'wi vona a famba ehenhla ka mati, va tshuka, va ku: “I xipuku,” kutani va huwelela hi ku chava.

²⁷ Kambe Yesu a hatlisa a vulavula na vona, a ku: “Tiyisani timbilu, hi mina, mi nga chaveni.”

²⁸ Kutani Petro a n'wi hlamula, a ku: “Hosi, loko u ri wena, vula leswaku ndzi ta kwalaho ka wena ehenhla ka mati.”

²⁹ Yesu a ku eka yena: “Tana.” Kutani Petro a huma ebyatsweni, a famba ehenhla ka mati, a ta eka Yesu.

³⁰ Kambe loko a vona mheho yi kurile, a tshuka, kakuloko a sungula ku nwela, a ba huwa, a ku: “Hosi, ndzi ponise.”

³¹ Yesu a hatlisa a tshambuluta voko, a n'wi khoma, a ku eka yena: “Munhu wa ku pfumela lokutsongo, u kanakanisile ha yini?”

³² Kuteloko va nghene ebyatsweni, mheho yi miyela.

³³ Kutani lava ngi va ri ebyatsweni va n'wi tshinelela, va n'wi khinsamela, va ku: “Kunene u N'wana wa Xikwembu.”

³⁴ Kuteloko va pelerile entsungeni, va nghena etikweni ra Genesareta.

³⁵ Vanhu va kona loko va tiva leswaku hi yena, va rhumela ematlhelweni hinkwawo ya kona leswaku va n'wi tisela hinkwavo lava vabyaka.

³⁶ Kutani va n'wi khongela leswaku a va pfumelela, hambi ku ri ku khumba mahlangula ya nguvu ya yena ntsena; kutani hinkwavo lava nga ma khumba va hanyisiwa.