Marka 3 - Xitsonga (Bibele)

Ta Yesu loko a hanyisa la khwanyaleke voko.

¹ Yesu a tlhela a nghena esinagogeni, kambe kona a ku ri ni munhu la khwanyaleke voko.

² Kutani va n'wi xiya ku vona xana u ta n'wi hanyisa hi siku ra Savata leswaku va ta n'wi hehla.

³ Kavaloko Yesu a ku eka munhu la khwanyaleke voko: “Suka, u yima la xikarhi.”

⁴ Kutani a ku eka vona: “Loko ku ri ku endla swinene ni ku endla swo biha, ku hanyisa munhu kumbe ku n'wi dlaya, leswi lulameke ku endliwa hi Savata hi swihi xana?” Kambe va miyela.

⁵ Yena a va rhalarhala hi mahlo hi ku kariha a vavisekile hi ku nonon'hwa ka timbilu ta vona; kambe a ku eka munhu loyi: “Tshambuluta voko ra wena.” A ri tshambuluta, kutani voko ra yena ri hanya.

⁶ Kuteloko Vafarisi va humile handle va kanela ni Vaheroda ku vona hilaha va nga ta n'wi dlaya hakona.

⁷ Kambe Yesu a tifambela ni vadyondzisiwa va yena hitlhelo, kusuhi ni lwandle, kutani vunyingi lebyikulu byi n'wi landza, byi hume eGaleliya na Yudiya,

⁸ na Yerusalema, na Idumiya, ni le hase ka Yordani; ni va le tikweni ra Tiri na Sidoni, kuteloko va twile leswikulu leswi a swi endleke va ta eka yena, va tele ngopfu.

⁹ Kutani a byela vadyondzisiwa va yena leswaku byatso byi ta na yena hikwalaho ka vunyingi, va nga tshuki va n'wi kandziyela.

¹⁰ Hikuva, hi leswi a hanyiseke lavo tala, hinkwavo lava ngi va ri ni vuvabyi a va tihoxa ka yena ku n'wi khumba.

¹¹ Ni mimoya ya thyaka, loko yi n'wi vona, a yi khinsama emahlweni ka yena, yi huwelela, yi ku: “U N'wana wa Xikwembu!”

¹² Kambe a yi tshinya ngopfu leswaku yi nga tshuki yi n'wi twarisa.

Ta ku vekiwa ka vaapostola.

¹³ Kutani a tlhandlukela entshaveni, a tivitanela lava a va rhandzaka, va ta eka yena.

¹⁴ A veka khume na vambirhi leswaku va va ka yena, ni leswaku a va rhuma ku dyondzisa

¹⁵ ni ku va ni matimba ya ku hlongola mademona.

¹⁶ A veka lava khume na vambirhi: I Simoni loyi a nga n'wi thya Petro;

¹⁷ na Yakobo n'wana Zebediya, na Yohane makwa Yakobo, valavo a va thya vito ra Bowanergesi, hileswaku vana va ndlati;

¹⁸ na Andriya na Filipi, na Bartolomi, na Matewu, na Tomasi, na Yakobo n'wana Alfiya, na Tadiya, na Simoni wa Kanana;

¹⁹ na Yudasi Iskariyota, a nga yena la n'wi xengeke.

Ta Belzebule.

²⁰ Kutani va ya endlwini ntshungu wu tlhela wu hlengeletana kona va ko va tsandzeka ni ku dya swakudya.

²¹ Varikwavo, loko va twa sweswo, va huma ku ya n'wi khoma, hikuva a va ku: “U hlangane nhloko.”

²² Kambe vatsari lava ngirimeleke Yerusalema, va ku: “U ni Belzebule, kutani u hlongola mademona hi hosi ya mademona.”

²³ Kutani kuteloko a va vitanele ka yena, a va byela hi xifaniso, a ku: “Xana Satana a nga swi kotisa ku yini ku hlongola Satana xana?

²⁴ Na kona loko ku fuma ku hambana hi le xikarhi, ku fuma loku ku nga ka ku nga tiyi.

²⁵ Ni yindlu loko yi hambene hi le xikarhi ku tilwisa, yindlu yoleyo yi nga ka yi nga tiyi.

²⁶ Na yena Satana loko a tilwisa a avana hi le xikarhi, a nga ka a nga tiyi, ku ta va ku hela ka yena.

²⁷ A ku na munhu loyi a kotaka ku nghena endlwini ya nhenha ku ya phanga xuma xa yona, a nga si rhanga a boha nhenha; hi kona a nga ta teka hinkwaswo swa yindlu ya yona.

²⁸ “Kunene ndzi ri eka n'wina: Vana va vanhu va nga khomeriwa swidyoho hinkwaswo ni swisandzu hinkwaswo leswi va nga sandza ha swona;

²⁹ kambe loyi a sandzaka Moya lowo Kwetsima, a nga ka a nga khomeriwi ni siku ni rin'we; kambe u ni nandzu lowu nga heriki.”

³⁰ A vurisa sweswo hikuva a va ku: “U ni moya wa thyaka.”

Ta varikwavo va Yesu.

³¹ Kutani mana wa yena ni vamakwavo va ta va yime handle va rhumela eka yena ku n'wi vita.

³² Kambe vunyingi a byi tshamile byi n'wi rhendzele. Kutani va ku eka yena: “Vona, mana wa wena ni vamakwenu, va kona la handle va ku lava.”

³³ Kutani a va hlamula, a ku: “Manana ni vamakwerhu i vamani?”

³⁴ Kavaloko a rhalarhala lava tshameke va n'wi rhendzele, a ku: “Langutani, lava nga vamanana ni vamakwerhu, hi valava;

³⁵ hikuva la endlaka ku rhandza ka Xikwembu, hi yena makwerhu wa wanuna ni wa wansati, na manana.”