Luka 24 - Xitsonga (Bibele)

Ta ku pfuka ka Yesu.

¹ Hi siku ro rhanga ra vhiki, eku humeni ka dyambu, va ya esirheni, va tamele mirhi ya risuna leyi va yi lunghiseke.

² Kambe va kuma ribye ri vumbuluxiwile enyangweni ya sirha.

³ Kuteloko va nghenile, a va kumanga ntsumbu wa Hosi Yesu.

⁴ Va ku va ha hlamala ha swona, vonani, vavanuna vambirhi va humelela eka vona, va ri ni tinguvu leti hatimaka.

⁵ Kakuloko va ha tshukile ngopfu, va korhamele ehansi, va ku eka vona: “Xana mi lavela yini la hanyaka exikarhi ka vafi?

⁶ A nga kona la, kambe u pfukile. Anakanyani hilaha a nga vulavula na n'wina hakona loko a ri eGaleliya,

⁷ loko a te: ‘N'wana wa Munhu, u fanekele ku nyiketiwa emavokweni ya vadyohi, a vambiwa, kutani a ta pfuka hi siku ra vunharhu.’ ”

⁸ Kutani va anakanya marito ya yena.

⁹ Kutani va suka esirheni, va ya vula timhaka leti hinkwato eka lava khume na un'we, ni ka van'wana hinkwavo.

¹⁰ Lava vikeleke vaapostola timhaka teto, a a ri Mariya Magadalena, na Yohana, na Mariya, mana wa Yakobo, ni van'wana lava ngi va ri na vona.

¹¹ Kambe timhaka teto a ti fana ni norho eka vona, kutani a va ti pfumelanga.

¹² Hambiswiritano Petro a suka, a tsutsumela esirheni, kuteloko a hlometele, a vona tinguvu ntsena, kutani a tlhelela ekaya ka yena, a ri karhi a hlamele hi lexi humeleke.

Ta Yesu loko a tikombisa eka vadyondzisiwa lava yaka Emawusi.

¹³ Hi siku rero, vambirhi exikarhi ka vona, a va ya emutini lowu vuriwaka Emawusi; vukule bya wona na Yerusalema, a yi ri mimpfhuka ya ntlhanu wa makume na khume rin'we.

¹⁴ A va vulavula hi timhaka hinkwato leti humeleleke.

¹⁵ Kakuloko va ha vulavula, va vutisana, Yesu hi xiviri xa yena, a va tshinelela, a famba na vona.

¹⁶ Kambe mahlo ya vona ma siveriwa, va nga n'wi tivi.

¹⁷ Kutani a ku eka vona: “Mi vulavula timhaka tihi endleleni, mi ni tingana hikwalaho ka yini xana?”

¹⁸ Un'wana, loyi vito ra yena a nga Keleyopasi a hlamula, a ku: “Xana exikarhi ka vaendzi va Yerusalema, hi wena u ri swaku la nga tiviki timhaka leti humeleleke kona hi masiku lawa xana?”

¹⁹ A ku eka vona: “Hi tihi xana?” Va ku eka yena: “Ta Yesu wa Nazareta, loyi ngi a ri muprofeta wa matimba, emitirhweni ni le ku vulavuleni, emahlweni ka Xikwembu ni tiko hinkwaro;

²⁰ ni hilaha vaprista lavakulu ni tihosana ta hina, va n'wi nyiketeke hakona ku avanyiseriwa rifu, kutani va n'wi vambile.

²¹ Loko hi ri hina, a hi tshembile leswaku hi yena la nga ta kutsula Israele; hambiswiritano, namuntlha i siku ra vunharhu timhaka leti, ti humeleleke ha rona.

²² Kambe vavasati van'wana va ka hina va hi hlamarisile ngopfu; va yile esirheni wa ha ri mixo,

²³ kutani a va kumanga ntsumbu wa yena; va fikile va vula leswaku va vonile mahlori ya tintsumi leti nga te: ‘Wa hanya.’

²⁴ Kutani van'wana va ka hina va yile esirheni, va kumile swi ri tano hilaha vavasati va vuleke hakona, kambe yena, a va n'wi vonanga.”

²⁵ Kutani a ku eka vona: “Yo! Vanhu lava nga twisisiki, va timbilu leti hlwelaka ku pfumela hinkwaswo leswi vuriweke hi vaprofeta!

²⁶ Xana a swi nga faneri leswaku Kriste a twisiwa ku vaviseka kuloku, kutani a nghena eku kwetsimeni ka yena xana?”

²⁷ Kutani a sungula hi Muxe ku yisa eka vaprofeta hinkwavo, a ri karhi a va ringanisela hi matsalwa hinkwawo timhaka leti a vuriweke ha tona.

²⁸ Kutani va tshinelela emutini lowu va yaka eka wona; kambe Yesu a endla kukotisa loko ingi u hundzela emahlweni.

²⁹ Kutani va n'wi sivela, va ku: “U nga xwa na hina, hikuva ri perile ni vusiku byi tshinele.” Kutani a nghena, a ya tshama na vona.

³⁰ Kakuloko a ri etafuleni na vona, a teka xinkwa, a khensa, kutani a phema, a va nyika.

³¹ Kavaloko mahlo ya vona ma hanyanya, kutani va n'wi tiva; kambe a va tlhakela.

³² Kutani va byelana, va ku: “Xana timbilu ta hina a ti pfurhanga endzeni ka hina loko a vulavula na hina endleleni, a hi hlamusela matsalwa xana?”

³³ Kutani hi nkarhi wolowo va suka, va tlhelela eYerusalema; va ya kuma lava khume na un'we va hlengeletene ni lava ngi va ri na vona, va ku:

³⁴ “Hosi yi pfukile eku feni kunene; yi humelele eka Simoni.”

³⁵ Kutani, na vona, va vula leswi nga va humelela endleleni, ni laha a tiviwaka hi vona eku phemeni ka xinkwa.

Ta Yesu loko a tikombisa eka vaapostola loko va hlengeletene.

³⁶ Kakuloko va ha byelana sweswo, Yesu a yima exikarhi ka vona hi xiviri xa yena, a ku eka vona: “Ku rhula a ku ve na n'wina!”

³⁷ Kambe va chava ngopfu, va tshuka, va ehleketa leswaku va vona ndzhuti.

³⁸ Yena a ku eka vona: “Mi tshukela yini? Meehleketo leyo tano yi humelela ha yini etimbilwini ta n'wina?

³⁹ Langutani swandla swa mina, ni milenge ya mina, hikuva hi mina hi xiviri. Ndzi tseveteleni, mi vona leswaku ndzhuti a wu na nyama ni marhambu, hilaha mi ndzi vonaka ndzi nga na wona.”

⁴⁰ Kakuloko a ha va byerisa sweswo, a va kombisa swandla swa yena ni milenge.

⁴¹ Kutani, hikuva eku tsakeni ni le ku hlamaleni ka vona, va ha kanakana, a ku eka vona: “Xana a mi na swakudya kwala xana?”

⁴² Kutani va n'wi nyika xikwavi xa nhlampfi leyi oxiweke, ni xihlenga xa vulombe;

⁴³ yena a swi teka, a dya emahlweni ka vona.

⁴⁴ Kutani a ku eka vona: “Hi tona timhaka leti ndzi nga mi byela tona, loko ndza ha ri na n'wina, ndzi ku: Timhaka hinkwato leti ndzi tsariweke ha tona enawini wa Muxe ni le Vaprofeteni, ni le Tipisalemeni, ti fanele ku hetisiwa.”

⁴⁵ Kavaloko a pfula ku twisisa ka vona, leswaku va twisisa Matsalwa.

⁴⁶ Kutani a ku eka vona: “Ku tsarisiwe sweswo, kambe a swi fanela leswaku Kriste a twisiwa ku vaviseka, kutani a pfuka eku feni hi siku ra vunharhu,

⁴⁷ ku ta vuriwa hi vito ra yena ku hundzuka ni ku rivaleriwa ka swidyoho exikarhi ka matiko hinkwawo, ku sungula hi Yerusalema.

⁴⁸ Kutani n'wina mi timbhoni ta timhaka leti, loko ndzi ri mina, ndzi ta mi rhumela ku lerisa ka Tatana.

⁴⁹ Kambe tshamani emutini wa Yerusalema, ku fikela siku leri mi nga ta funengetiwa hi matimba ya le henhla.”

Ta ku tlhandluka ka Hosi.

⁵⁰ Kutani a va yisa ehandle ka muti, ku ya fika ekusuhi na le Betaniya, kutani a tlakusa mavoko ya yena ehenhla a va katekisa.

⁵¹ Kuteloko a ha va katekisa, a avana na vona, a tlhandlukisiwela ehenhla etilweni.

⁵² Kuteloko va n'wi khinsamele va tlhelela eYerusalema hi ku tsaka lokukulu.

⁵³ Kutani a va tiyisela etempeleni hi masiku, va ri karhi va dzunisa ni ku tlangela Xikwembu.