Levhitika 9 - Xitsonga (Bibele)

Ta Aroni ni vana va yena loko va sungula ntirho wa vuprista.

¹ Siku ra ntlhanu na manharhu, Muxe a vitana Aroni ni vana va yena, ni vakulukumba va Israele,

² a ku eka Aroni: “Teka xinkuzana xa gandzelo ra nandzu, ni khuna ra holokosta, swi nga ri na xivati, u swi tlhavela Yehovha.

³ Kutani u byela vana va Israele, u ku: ‘Tekani xiphongo xa gandzelo ra nandzu, ni rhole, ni xinyimpfana swa lembe rin'we, swi nga ri na xivati, swi va swa holokosta;

⁴ ni nkunzi, ni khuna ra gandzelo ra ku khensa ku swi tlhavela Yehovha, ni nhlengo lowu nga pfuviwa hi mafurha; hikuva namuntlha Yehovha u ta tikombisa eka n'wina.’ ”

⁵ Kavaloko va tisa emahlweni ka tabernakela ya nhlengeletano leswi lerisiweke hi Muxe; kutani nhlengeletano hinkwayo yi tshinela, yi yima emahlweni ka Yehovha.

⁶ Muxe a ku: “Hi xona lexi Yehovha a mi leriseke xona; xi endleni, kutani ku kwetsima ka Yehovha ku ta mi humelela.”

⁷ Muxe a ku eka Aroni: “Tshinela ekusuhi ni alitari, u humesa gandzelo ra nandzu, ni holokosta, u tiphahlela mhamba ya wena ni ya tiko; u ta humesa ni nhlengo wa tiko, u va phahlela mhamba hilaha Yehovha a leriseke hakona.”

⁸ Aroni a tshinela ealitarini, a tlhava rhole ra gandzelo ra nandzu leri humeseriweke yena.

⁹ Vana va Aroni va n'wi tisela ngati, a peta ritiho ra yena engatini a yi tota etimhondzweni ta alitari kutani a chela ngati ehansi ka alitari.

¹⁰ A hisa mafurha ni tinswo, ni mpambana wa xivindzi, ehenhla ka alitari, swi ri swa gandzelo ra nandzu, hilaha Yehovha a leriseke Muxe hakona.

¹¹ Loko yi ri nyama ni dzovo, a swi hisa ehandle ka mixaxa.

¹² Kutani a tlhava xifuwo xa holokosta. Vana va Aroni va n'wi tisela ngati, a yi xuva ealitarini, ematlhelweni hinkwawo.

¹³ Va n'wi tisela holokosta hi swirho swa yona, ni nhloko kutani a swi hisa ealitarini.

¹⁴ A hlantswa marhumbu ni masondzo, a swi hisa ehenhla ka holokosta, ealitarini.

¹⁵ Kavaloko a tisa nhlengo wa tiko. A teka xiphongo xa gandzelo ra nandzu lexi humeseriweke tiko a xi tlhava, a endla gandzelo ra nandzu ha xona, kukotisa mhamba yo sungula.

¹⁶ Kutani a humesa holokosta, a yi humesa hi nawu wa yona.

¹⁷ A humesa ni nhlengo; a nusa hi xandla xin'we, a swi hisa ealitarini ku engetela holokosta ya mixo.

¹⁸ A tlhava ni nkunzi ni khuna, swi endleriwa tiko gandzelo ra ku khensa. Vana va Aroni va n'wi tisela ngati, a xuva alitari ha yona ematlhelweni hinkwawo.

¹⁹ Va n'wi tisela ni mafurha ya nkunzi ni ya khuna, ni ncila ni mpambana, ni tinswo, ni mpambana wa xivindzi;

²⁰ va veka mafurha ehenhla ka swifuva, kutani a hisa mafurha ealitarini.

²¹ Loko swi ri swifuva ni voko ra xinene, Aroni a swi ndziwita emahlweni ka Yehovha yi va nyiko leyi ndziwitiweke, hilaha Muxe a leriseke hakona.

²² Kutani Aroni a tlakusa mavoko tlhelo ra tiko a ri katekisa; kuteloko a hetile gandzelo ra nandzu, ni holokosta, ni gandzelo ra ku khensa a xika ealitarini.

²³ Kutani Muxe na Aroni va nghena etabernakeleni ya nhlengeletano, kutani va huma, va katekisa tiko; ku kwetsima ka Yehovha ku vonakala eka tiko hinkwaro.

²⁴ Ndzilo wu huma emahlweni ka Yehovha, wu hisa holokosta, ni mafurha ealitarini; tiko hinkwaro ri wu vona, kutani va huwelela hi ku tsaka, va tiwisa ehansi hi mimombo ya vona.