Levhitika 5 - Xitsonga (Bibele)

Ta magandzelo hikwalaho ka milandzu yin'wana.

¹ “ ‘Loko munhu a hlambanyile a ri mbhoni, kutani loyi a nga mbhoni la hlambanyisiweke loko a nga vuri leswi a swi voneke, kumbe leswi a swi tivaka, u ta rhwala nandzu wa yena.

² Kumbe loko munhu a khumba a nga swi tivi, xilo lexi yilaka, kukotisa ntsumbu wa xiharhi, hambi wu ri ntsumbu wa xifuwo, hambi wu ri ntsumbu wa xikokovi, u tinyamisile, u ni nandzu.

³ Loko munhu a khumbile a nga swi tivi thyaka ra munhu, hambi ri ri rihi ni rihi leri nyamisaka, kutakuloko u swi tiva, u ni nandzu.

⁴ Loko munhu a tiboha ntsena hi nomu, kutani a hlambanya leswaku a ta endla swo biha kumbe swo saseka hi mukhuva wokari ni wokari, hambi a nga swi tivanga; kutakuloko a swi tiva; u ni nandzu.

⁵ Munhu loyi a nga ni nandzu lowo tano, u ta tivula nandzu wa yena;

⁶ u ta humesela Yehovha hikwalaho ka nandzu wa yena, ntswele ya xifuwo lexitsongo, hambi yi ri nyimpfu, hambi mbuti leswaku yi va mhamba yo susa nandzu, kutani muprista u ta n'wi phahlela mhamba hikwalaho ka nandzu wa yena.

⁷ “ ‘Kungakuloko a pfumala nyimpfu, kumbe mbuti, u ta humesela Yehovha hikwalaho ka nandzu wa yena, matuva mambirhi, kumbe mavondlo mambirhi ya magugurhwana, rin'wana ra mhamba yo susa nandzu, rin'wana ra gandzelo leri hisiwaka.

⁸ U ta ma tisa eka muprista yena u ta humesa eku sunguleni leri nga ra nandzu. Muprista u ta tsema nhloko hi n'wala ekusuhi ni nhamu, a nga yi avanyisi ni miri wa rona;

⁹ kutani u ta xuva matlhelo ya alitari hi ngati ya mhamba ya nandzu; ngati leyi seleke, yi ta kameriwa ehansi ka alitari; hi yona mhamba ya nandzu.

¹⁰ Hi nyanyana leya vumbirhi, u ta endla gandzelo leri hisiwaka hi nawu wa kona. Hi mukhuva wolowo, muprista u ta phahlela munhu loyi, mhamba, hikwalaho ka nandzu wa yena, kutani u ta rivaleriwa.

¹¹ “ ‘Loko a pfumala matuva mambirhi hambi mavondlo mambirhi ya magugurhwana, u ta humesela nandzu wa yena ku avanyisa ka vukhume ka efa ya mapa layo basa, yi ta va mhamba ya nandzu. A nga tshuki a chela mafurha ehenhla ka wona, hambi yi ri mirhi ya risuna, hikuva i mhamba ya nandzu.

¹² U ta ma tisa eka muprista, yena muprista u ta nusa eka wona, xandla xin'we, ku endla xitsundzuxo, a xi hisa ealitarini kukota magandzelo lama hiseriwaka Yehovha; i gandzelo ra nandzu.

¹³ Muprista u ta phahlela munhu loyi, mhamba ya nandzu lowu a wu kumeke emhakeni yin'wana ya leti, kutani u ta rivaleriwa. Mapa lama nga ta sala, ma ta va ya muprista, kukotisa leswi endliwaka egandzelweni ra nhlengo.’ ”

Ta magandzelo man'wana ya ku riha.

¹⁴ Yehovha a byela Muxe, a ku:

¹⁵ “Loko munhu a endla xilo lexi nga faneriki, a dyoha ku nga ri ha vomu, hi ku tshama ni xilo lexi hlawuleriweke Yehovha, u ta tisela Yehovha gandzelo ra ku riha; ri va khuna leri nga riki na xivati, leri hlawuriweke entlhambini, leri u ri ringaniseke hi mali ya tixikele, hi mpimo wa xikele ya vukwetsimelo; hi rona gandzelo ra ku riha.

¹⁶ U ta humesa mali ya lexi a xi tekeke xi ri xa vukwetsimelo; kambe a engetela hi vuntlhanu bya swona, a swi nyika muprista; kutani muprista u ta n'wi phahlela mhamba hi khuna leri humesiwaka ku va gandzelo ra ku riha, kutani u ta rivaleriwa.

¹⁷ “Loko munhu a dyohile, a endle xilo lexi nga pfumeleriwiki hi nawu wa Yehovha, kambe a nga swi tivi, u ta va ni nandzu, u ta rhwala nandzu wa yena.

¹⁸ U ta tisela muprista ku riha nandzu wa yena, khuna leri nga riki na xivati, leri hlawuriweke entlhambini wa yena, leri u ri ringaniseke; muprista u ta n'wi phahlela mhamba hikwalaho ka nandzu lowu a nga wu kuma a nga swi tivi, kutani u ta rivaleriwa.

¹⁹ Hi rona gandzelo ra ku riha, ra munhu loyi u dyoheleke Yehovha.”