Levhitika 24 - Xitsonga (Bibele)

Ta milawu ya mavoningo ni ya swinkwa swa xikombiso.

¹ Yehovha a byela Muxe, a ku:

² “Lerisa vana va Israele va ku tisela mafurha yo saseka ya mitlhwari leyi khuvutiweke, leswaku ma cheriwa hi masiku hinkwawo emavoningweni ya kandelari.

³ Aroni a ta yi lunghisa ehandle ka xisirhelo xa vumbhoni, etabernakeleni ya nhlengeletano; ya ta pfurha emahlweni ka Yehovha hi masiku hinkwawo, ku sungula nimadyambu, ku fika nimixo: I ku lerisa loku nga heriki ka vatukulu va n'wina.

⁴ U ta vekela mavoningo ekandelarini ya nsuku leswaku ma pfurha emikarhini hinkwayo emahlweni ka Yehovha.

⁵ “U ta teka mapa layo saseka, u sweka ha wona swinkwa swa khume na swimbirhi; xinkwa xin'wana ni xin'wana xi va xa mipimo mimbirhi ya vukhume bya efa.

⁶ U ta swi vekela etafuleni ra nsuku emahlweni ka Yehovha, swi xaxametana, swi endla tinxaxa timbirhi; rixaxa rin'wana ni rin'wana ri va ni swinkwa swa ntlhanu na xin'we.

⁷ U ta veka ehenhla ka rixaxa rin'wana ni rin'wana murhi wa risuna, xi va xitsundzuxo ehenhla ka swinkwa, yi nga nyiko leyi hisiwaka emahlweni ka Yehovha.

⁸ Hi Savata yin'wana ni yin'wana, swinkwa leswi swi ta vekiwa emahlweni ka Yehovha, swi vekiwa kona hi masiku hinkwawo hi vana va Israele. I ntwanano lowu nga heriki.

⁹ Swi ta va swa Aroni ni vana va yena, va ta swi dya exivandleni lexo hlawuleka hikuva i xilo lexi hlawulekeke ngopfu eka vona, lexi pamburiweke emihlengweni leyi humeseriwaka Yehovha hi ndzilo. I ku lerisa loku nga heriki.”

Ta ku avanyisa ka vasandzi ni vadlayi.

¹⁰ N'wana wa wansati wa Muisraele, kambe tata wa yena a a ri Muegipta, a ta exikarhi ka vana va Israele; a lwa emixaxeni ni wanuna wa Israele.

¹¹ Kavaloko n'wana wa wansati wa Israele a sandza ni ku rhuketela vito ra Xikwembu; kutani va n'wi tisa eka Muxe. Vito ra mana wa yena a a ri Xelomiti, n'wana Dibri, wa nyimba ya Dani.

¹² Va n'wi nghenisa ekhotsweni, Muxe a kondza a va byela leswi lerisiwaka i Yehovha.

¹³ Kutani Yehovha a byela Muxe, a ku:

¹⁴ “Humesa musandzi ehandle ka mixaxa, kutani hinkwavo lava n'wi tweke va ta tlhandleka mavoko ya vona enhlokweni ya yena, kutani nhlengeletano hinkwayo yi ta n'wi khandla hi maribye.

¹⁵ U ta byela vana va Israele, u ku eka vona: Mani na mani la rhukanaka Xikwembu xa yena, u ta rhwala ku biwa ka ku dyoha ka yena.

¹⁶ La sandzeke vito ra Yehovha u ta biwa hi rifu; nhlengeletano hinkwayo yi ta n'wi khandla hi maribye. Hambi muluveri, hambi wa tiko, u ta fa hikuva u sandzile vito ra Xikwembu.

¹⁷ “La baka munhu, hambi a ri mani na mani, kutani a fa, u ta dlawa.

¹⁸ “La baka xifuwo, kutani xi fa, u ta humesa xifuwo xin'wana ematshan'weni ya xona: vutomi byi rihisiwa hi vutomi.

¹⁹ “La boxaka mbanga emirini wa un'wana wa rikwavo, u ta endliwa kukotisa leswi a n'wi endleke swona.

²⁰ Ku tshoviwa ku rihisiwa hi ku tshoviwa, tihlo hi tihlo, tino hi tino; mbanga leyi a yi boxeke ka munhu, yi ta boxiwa eka yena.

²¹ “La dlayaka xifuwo, u ta riha hi xifuwo. La dlayaka munhu, u ta dlawa.

²² “Mi ta va ni nawu wun'we eka hinkwavo; wu ta va wun'we eka muluveri ni ka la tswariweke etikweni; hikuva hi mina Yehovha, Xikwembu xa n'wina.”

²³ Kavaloko Muxe a byela vana va Israele timhaka leti, kutani va humesa ehandle ka mixaxa la sandzeke, va n'wi dlaya hi maribye. Vana va Israele va endla hi laha Yehovha a leriseke Muxe hakona.