Levhitika 1 - Xitsonga (Bibele)

Ta timhamba leti hisiwaka. (Tiholokosta.)

¹ Yehovha a vitana Muxe, a vulavula na yena a ri etabernakeleni ya nhlengeletano, a ku:

² “Byela vana va Israele, u ku eka vona: ‘Kutakuloko un'wana wa n'wina a humesela Yehovha nhlengo, mi ta humesa swifuwo leswikulu ni leswitsongo, wu ve nhlengo wa n'wina.

³ “ ‘Loko nhlengo wa yena yi ri holokosta ya xifuwo lexikulu, u ta humesa nkunzi leyi nga riki na xivati; u ta yi humesa enyangweni ya tabernakela ya nhlengeletano, yi ta amukeriwa emahlweni ka Yehovha.

⁴ U ta tlhandleka voko ra yena enhlokweni ya holokosta kutani yi ta amukeriwa; u ta endleriwa mhamba ha yona.

⁵ Va ta tlhava nkunzi emahlweni ka Yehovha, kutani vaprista, vana va Aroni va ta humesa ngati, va yi halatela ematlhelweni hinkwawo, ehenhla ka alitari leyi nga enyangweni ya tabernakela ya nhlengeletano.

⁶ Va ta yevula mhamba leyi hisiwaka, va tsemelela tinyama ta yona.

⁷ Kutani vana va Aroni, muprista, va ta tshivela ndzilo ealitarini, va veketela tihunyi endzilweni.

⁸ Kutani vaprista, vana va Aroni va ta veketela tinyama, ni nhloko, ni mafurha ehenhla ka tihunyi leti vekiweke endzilweni, ehenhla ka alitari.

⁹ Va ta hlantswa marhumbu ni swirho ematini, kutani muprista u ta hisa hinkwaswo ealitarini, yi va holokosta; i mhamba leyi hisiwaka, leyi nga ni risuna eka Yehovha.

¹⁰ “ ‘Loko nhlengo wa yena wu ri wa swifuwo leswitsongo, ti nga tinyimpfu kumbe timbuti, ti va ta holokosta, u ta humesa ya xinuna leyi nga riki na xivati.

¹¹ Va ta yi tlhavela tlhelo ra n'walungu ra alitari, emahlweni ka Yehovha, kutani vaprista, vana va Aroni va ta halatela ngati ealitarini, ematlhelweni hinkwawo.

¹² Va ta yi tsemelela, swin'we ni nhloko ni mafurha ya yona, kutani muprista u ta swi veketela ehenhla ka tihunyi leti va tshiveleke ndzilo ealitarini ha tona.

¹³ Va ta hlantswa marhumbu ni swirho ematini, kutani muprista u ta hisa hinkwaswo ealitarini, yi va holokosta; i mhamba leyi hisiwaka, leyi nga ni risuna eka Yehovha.

¹⁴ “ ‘Loko nhlengo wa yena eka Yehovha, wu ri holokosta ya tinyanyana, u ta humesa nhlengo wa matuva kumbe wa magugurhwana.

¹⁵ Muprista u ta humesa nyanyana ealitarini, u ta tsema nhloko hi n'wala ku yi hisa ealitarini, yona ngati, yi ta kameriwa etlhelweni ra vuxa ra alitari.

¹⁶ U ta susa xikwirikwiri ni thyaka ra xona, a swi cukumeta etaleni ekusuhi ni alitari, evuxeni.

¹⁷ U ta handzula nyanyana exikarhi ka timpapa, a nga yi avanyisi, kutani muprista u ta yi hisa ealitarini, ehenhla ka tihunyi leti va tshiveleke ndzilo ha tona; i holokosta, i mhamba leyi hisiwaka leyi nga ni risuna eka Yehovha.