Hosiya 5 - Xitsonga (Bibele)

Ta ku tshinyiwa ka vaprista ni tihosi.

¹ Twanani mhaka leyi, n'wina vaprista, mi yingisa yona, va Yindlu ya Israele, na n'wina va yindlu ya hosi mi rhiya ndleve, hikuva ku avanyisiwa n'wina; hikuva mi ve tanihi xirimbana eMispa, ni tanihi rindzi leri ceriweke ehenhla ka Taboro.

² Hi magandzelo ya vona va humela emahlweni eku tluleni ka vona, kambe mina ndzi ta va tshinya hinkwavo.

³ Mina ndzi tiva Efrayimi, kambe Israele a nga tumbetiwi eka mina; hikuva sweswi, wa oswana, wena Efrayimi; na yena Israele wa tinyamisa.

⁴ Swiendlo swa vona a swi va pfumeleli ku tlhelela eka Xikwembu xa vona, hikuva moya wa vuoswi wu le xikarhi ka vona, kutani Yehovha, a va n'wi tivi.

⁵ Ku tikurisa ka Israele ku endle vumbhoni bya xivi xa yena emahlweni ka yena; Israele na Efrayimi va ta khunguvanyeka hi ku homboloka ka vona; ku ta khunguvanyeka na Yuda swin'we na vona.

⁶ Va ta lava Yehovha hi tinyimpfu ta vona, ni tihomu ta vona, kambe va nga ka va nga n'wi kumi: U va fularhelile.

⁷ Yehovha, va n'wi endlele vuntswaka, hikuva va veleke vana va vuoswi; kambe sweswi, n'weti yin'we yi ta va heta ni rifuwo ra vona.

⁸ Yimbani mhalamhala eGibeya, mi yimba nanga eRhama; banani nkosi eBeta-Avene: Xirha xi le ndzhaku ka wena, Benjamini!

⁹ Efrayimi u ta hundzuka mananga esikwini ra ku biwa; exikarhi ka tinyimba ta Israele ndzi tivisa mhaka leyi tiyeke.

¹⁰ Tihosi ta Yuda ti tanihi lava tshinetaka ndzilakana. Ndzi ta chulula vukari bya mina ehenhla ka vona ku fana ni mati.

¹¹ Efrayimi wa tikeriwa, u tshovekile eku avanyiseni, hikuva u tirhandzele ku ya hi ku lerisa loku a tiendleleke kona,

¹² kutani mina ndzi tanihi nsumba eka Efrayimi, ni ku bola ka marhambu eka yindlu ya Yuda.

¹³ Efrayimi a vona vuvabyi bya yena, na Yuda a vona xilondza xa yena; Efrayimi u yile eka Vaaxuru, u rhumile eka hosi Yarebe; kambe yeloyi a nga ka a nga tivi ku mi pfuna, a nga ka a nga horisi xilondza xa n'wina.

¹⁴ Hikuva ndzi tanihi nghala eka Efrayimi, ni tanihi nghalanyana eka yindlu ya Yuda. Mina, mina hi xiviri, ndzi ta handzula kutani ndzi tifambela; ndzi ta teka lexi ndzi xi phangeke, kambe a ku na la nga xi kutsulaka.

¹⁵ Ndzi ta suka, ndzi tlhelela exivandleni xa mina, ndzi tshama kona, va kondza va titwa swidyoho swa vona, va lava mombo wa mina. Ekhombyeni ra vona, va ta ndzi lava.