Genesa 46 - Xitsonga (Bibele)

Ta Yakobo loko a suka eKanana a ya eEgipta.

¹ Israele a suka a ri ni swilo swa yena hinkwaswo; a fika eBerexeba, a humesela Xikwembu xa Isaka, tata wa yena, magandzelo.

² Kutani Xikwembu xi vulavula na Israele hi swivonakariso swa vusiku, xi ku: “Yakobo, Yakobo!” A hlamula a ku: “Hi mina loyi.”

³ Xi ku: “Hi mina Xikwembu, Xikwembu xa tata wa wena; u nga chavi ku ngirimela eEgipta, hikuva ndzi ta ku endla tiko lerikulu kona.

⁴ Na mina ndzi ta ngirimela eEgipta na wena, kambe ndzi ta tlhela ndzi ku tlhandlukisela halenu hakunene; Yosefa u ta ku vuyetela mahlo.”

⁵ Yakobo a suka eBerexeba; vana va Israele va fambisa Yakobo, tata wa vona, ni swihlangi swa vona, ni vasati va vona hi tigolonyi toleto Faro a nga ti rhuma ku ya va rhurhisa.

⁶ Va teka ni mitlhambi ya vona ni swigotso leswi ngi va ri na swona etikweni ra Kanana, va kongoma eEgipta, a ri Yakobo ni rixaka ra yena hinkwaro.

⁷ A teka na yena vana va yena, ni vatukulu va yena, ni vana va xisati va yena, ni vatukulu va xisati va yena, ni rixaka ra yena hinkwaro, va ya eEgipta.

Ntsengo wa lava yeke eEgipta.

⁸ Mavito ya vana va Israele lava nga ya eEgipta, hi lawa: Yakobo ni vana va yena. Mativula ya Yakobo i Rhuveni.

⁹ Vana va Rhuveni: Hanoko, na Palu na Hesironi na Karimi.

¹⁰ Vana va Simiyoni: Yemuwele, na Yamini, na Ohada, na Yakini, na Sohari, na Xawulu, n'wana wa nsati wa Mukanana.

¹¹ Vana va Levhi: Gerixoni, na Kohata na Merari.

¹² Vana va Yuda: Ere, na Onani, na Xela, na Perese na Zera; kambe Ere na Onani a va fele etikweni ra Kanana. Vana va Perese a a ri Hesironi na Hamula.

¹³ Vana va Isakara: Tola, na Puwa, na Yobo na Ximroni.

¹⁴ Vana va Zebuloni: Seredi, na Elone na Yahaliele.

¹⁵ Hi vona vana va Leya, lava a velekeleke Yakobo, loko va ha ri Padani-Aramu, na Dina, n'wana wa xisati wa Yakobo; vana va yena va xinuna ni va xisati a va ri vanhu va 33.

¹⁶ Vana va Gadi: Sefoni, na Hagi, na Xuni, na Esiboni, na Eri, na Arodi na Areli.

¹⁷ Vana va Asere: Yimina, na Yixivha, na Yixivhi, na Beriya, na Seraka, makwavo wa xisati wa vona. Vana va Beriya a va ri va Hebere na Malikiele.

¹⁸ Hi vo lavo vana va Zilipa, yeloyi Labani a nyikeke Leya, n'wana wa yena; a velekele Yakobo vanhu valavo, va khume na ntlhanu na un'we.

¹⁹ Vana va Rahele, nkata Yakobo: Yosefa na Benjamini.

²⁰ Etikweni ra Egipta, Yosefa a veleka Manase na Efrayimi, lava a velekeriweke hi Asnati, n'wana Potifera, muprista wa Ono.

²¹ Vana va Benjamini: Bela, na Bekere, na Axibele, na Gera, na Naamani, na Ehi, na Roxa, na Mupimi, na Hupimi, na Aridi.

²² Valavo i vana va Rahele, lava a velekeleke Yakobo; hinkwavo a va ri vanhu va khume na mune.

²³ N'wana wa Dani a a ri Huximi.

²⁴ Vana va Neftali: Yahasele, na Guni, na Yesere, na Xileme.

²⁵ Hi vona vana va Biliha, yeloyi Labani a nga nyika Rahele, n'wana wa yena; a velekela Yakobo vana valavo; hinkwavo a va ri vanhu va ntlhanu na vambirhi.

²⁶ Vanhu hinkwavo lava nga ya Egipta na Yakobo, va hume eswifungheni swa yena, a va ri vanhu va 66, ehandle ka vasati va vana va Yakobo.

²⁷ Kutani vana va Yosefa, lava velekeriweke yena eEgipta, a va ri vambirhi. Vanhu hinkwavo va yindlu ya Yakobo lava nga ya eEgipta, a va ri 70.

Ta ku fika ka Yakobo eEgipta a aka kona.

²⁸ Yakobo a rhangisa Yuda emahlweni, a n'wi rhumela eka Yosefa, a ta n'wi lunghisela ndlela ya eku ya eGoxeni. Va fikisa sweswo etikweni ra Goxeni.

²⁹ Kutani Yosefa a bohela kalichi yakwe, a khandziya, a ya hlangana na Israele, tata wakwe, eGoxeni, kutani a humelela eka yena, a wela enhan'wini ya yena, a rila a hlwela enhan'wini ya yena.

³⁰ Kutani Israele a ku eka Yosefa: “A ndzi fe sweswi, leswi ndzi nga vona mombo wa wena, hikuva wa karhi wa hanya.”

³¹ Kutani Yosefa a ku eka vamakwavo ni ka va yindlu ya tata wa yena: “Ndza ha tlhela ndzi ya tivisa Faro, ndzi ta ku eka yena: ‘Vamakwerhu ni va yindlu ya tatana lava humaka etikweni ra Kanana, va fikele la ka mina;

³² vanhu lava, i varisi, hikuva ntirho wa vona i ku risa mitlhambi, va tile ni swifuwana swa vona ni swifuwo swa vona, ni swigotso hinkwaswo leswi va nga na swona.’

³³ Kutakuloko Faro a mi vitana, a mi vutisa, a ku: ‘Mitirho ya n'wina i yihi?’

³⁴ mi ta ku eka yena: ‘Malandza ya wena i varisi va mitlhambi, ku suka evutsongwaneni bya hina ku fikela sweswi, hina ni vatata wa hina.’ Hi kona mi nga ta tiva ku tshamisa etikweni ra Goxeni, hikuva varisi hinkwavo va mitlhambi va nyenyetsa etikweni ra Egipta.”