Genesa 4 - Xitsonga (Bibele)

Ta Kayini na Avele.

¹ Adamu a tiva Evha, nsati wa yena, kutani a tika nyimba, a veleka Kayini, a ku: “Ndzi kumile munhu ha Yehovha.”

² A engeta a veleka ndzisana ya yena Avele; Avele a a ri murisi; Kayini, yena, a a rima misava.

³ Endzhaku ka masiku man'wana, Kayini a humesela Yehovha nhlengo wa mihandzu ya misava.

⁴ Avele a humesa, na yena, mativula ya ntlhambi wa yena, ni mafurha ya wona. Kutani Yehovha a khensa Avele ni nhlengo wa yena,

⁵ kambe a nga langutanga hi ku tsaka Kayini, ni nhlengo wa yena; kutani Kayini a kariha ngopfu, ni mombo wa yena wu khanyana.

⁶ Kutani Yehovha a byela Kayini, a ku: “Xana u karihela yini, ni mombo wa wena wu khanyana ha yini?

⁷ Loko u endla swinene, xana a u nga ti khensiwa xana? Kambe loko u nga endli swinene, vudyoho byi tshamile enyangweni; ku navela ka byona ku ta ku wonga; kambe wena, u fanele ku byi hlula.”

⁸ Kutani Kayini a vulavula na Avele, ndzisana ya yena; kutani, kuteloko va ri emasin'wini, Kayini a pfukela Avele, ndzisana ya yena, a n'wi dlaya.

⁹ Kutani Yehovha a ku eka Kayini: “Makwenu Avele, u kwihi?” Yena a ku: “A ndzi n'wi tivi. Xana hi mina mulanguteri wa makwerhu-ke?”

¹⁰ Kambe Yehovha a ku: “U endle yini? Rito ra ngati ya makwenu ri huwelele emisaveni, ri ta eka mina.

¹¹ Sweswi, u ta rhuketeriwa hi misava leyi nga ahlamisa nomu wa yona, yi amukela ngati ya makwenu hi voko ra wena.

¹² Kutakuloko u rima misava, yi nga ka yi nga ha ku nyiki mihandzu ya yona; u ta va la pepetsekaka ni la fambafambaka emisaveni.”

¹³ Kutani Kayini a ku eka Yehovha: “Ku biwa ka mina kukulu, ku tlurisa lexi ndzi nga xi pingaka.

¹⁴ Waswivo, u ndzi hlongole namuntlha ehenhla ka misava, ndzi ta va ndzi hambene ni mombo wa wena, kutani ndzi ta va mupepetseki ni mufambi emisaveni, kutani mani na mani loko a ndzi kuma, u ta ndzi dlaya.”

¹⁵ Kutani Yehovha a ku eka yena: “Kungakuloko munhu a dlaya Kayini, Kayini u ta rihiseriwa kantlhanu na kambirhi. Kutani Yehovha a fungha Kayini, hileswaku un'wana ni un'wana la n'wi kumaka a nga ti n'wi dlaya.”

¹⁶ Kutani Kayini a suka emahlweni ka Xikwembu, a ya tshama etikweni ra Nodo, evuxeni bya Edeni.

Ta Vana va Kayini.

¹⁷ Kutani Kayini a tiva nsati wa yena; kutani a tika nyimba, a veleka Enoko; endzhaku, a aka muti, a thya muti lowu hi vito ra n'wana wa yena Enoko.

¹⁸ Kutani Irada a velekeriwa Enoko; kutani Irada a va tata wa Mehuyaele; Mehuyaele a va tata wa Metuxaele; Metuxaele a va tata wa Lameke.

¹⁹ Kutani Lameke a teka vasati vambirhi, vito ra un'wana a a ri Ada, ni vito ra un'wana a a ri Sila.

²⁰ Ada a veleka Yabala; hi yena loyi a nga tata wa lava hanyaka emitsongeni va ri ni mitlhambi.

²¹ Vito ra ndzisana ya yena a a ri Yubala, hi yena loyi a nga tata wa hinkwavo lava yimbaka magupu ni tinanga.

²² Sila na yena a veleka Tubala-Kayini, loyi a tshameke a fula mitirho ya nsuku ni nhumbu. Makwa wa xisati wa Tubala-Kayini a a ri Naama.

²³ Kutani Lameke a byela vasati va yena, a ku: “Ada na Sila, twanani rito ra mina! Vasati va Lameke, yingisani ku vulavula ka mina! Ndzi dlele munhu hikwalaho ka mbanga ya mina, ni jaha hikwalaho ka felangati ra mina.

²⁴ Kayini u rihiseriwa kantlhanu na kambirhi, yena Lameke, eka ntlhanu wa makume ni makume mambirhi, na ntlhanu na mambirhi!”

²⁵ Adamu a engeta a tiva nsati wa yena, kutani a veleka n'wana wa wanuna; a n'wi thya vito ra Seta (ku veka), a ku: “Hi leswi Xikwembu xi nga ndzi vekela vana ematshan'weni ya Avele, loyi a nga dlawa hi Kayini.”

²⁶ Seta na yena a veleka n'wana wa wanuna, loyi a n'wi chulaka vito ra Enosi. Hi wona nkarhi lowu va sungulaka ku khongela vito ra Yehovha.