Genesa 32 - Xitsonga (Bibele)

Ta Yakobo loko a hlangana ni tintsumi; a rhumela eka Esawu.

¹ Yakobo a famba hi ndlela ya yena: kutani tintsumi ta Xikwembu ti hlangana na yena.

² Kuteloko Yakobo a ti vona, a ku: “I nxaxa wa Xikwembu!” Kutani a thya xivandla lexi, vito ra Mahanayimi (mixaxa mimbirhi).

³ Kavaloko Yakobo a rhangisa tintsumi emahlweni, ti ya eka Esawu, makwavo, etikweni ra Seyira, ebanyini ra Edomu,

⁴ a va lerisa mhaka leyi, a ku: “Mi ta byerisisa swinene hosi ya mina Esawu, mi ku: ‘Yakobo, nandza wa wena, a ku: Ndzi tshamile nkarhi eka Labani, ndzi tshame eka yena ku fikela sweswi;

⁵ ndzi ni tihomu ni timbhongolo, ni swifuwana, ni malandza ya vavanuna ni ya vavasati, ndzi tivisa sweswo hosi ya mina, ndzi ta tiva ku kuma tintswalo emahlweni ka wena.’ ”

⁶ Kutani tintsumi ti vuya eka Yakobo ti ku: “Hi yile eka makwenu, eka Esawu, kambe na yena wa ta ku ta hlangana na wena, u ni vanhu va mune wa madzana.”

⁷ Kutani Yakobo a chava ngopfungopfu, a hlomuriwa mbilu; kutani a pambula vanhu lava ngi a ri na vona, ni swifuwana, ni swifuwo, ni tikamela, a endla mitlhambi mimbirhi;

⁸ a ku: “Kungakuloko Esawu a ta tlhava ntlhambi wun'wana, wun'wana ntlhambi lowu nga ta siyiwa, wu ta kuma ku pona.”

⁹ Kutani Yakobo a ku: “Oho! Xikwembu xa tatana Abrahama, ni Xikwembu xa tatana Isaka, wena Yehovha, loyi u nga te eka mina: ‘Tlhelela eka rikwenu ni le tikweni ra vatata wa wena, ndzi ta ku endla swinene,’

¹⁰ a ndzi ringani tintswalo ta wena hinkwato, ni ku tshembeka hinkwako loku u ku humeseleke nandza wa wena; kasi ndzi pele Yordani loyi, ndzi ri ni nhonga ya mina ntsena, kasi sweswi, ndzi hundzuke mixaxa mimbirhi.

¹¹ Ndza ku khongela, ndzi ponise evokweni ra hosi ya mina, evokweni ra Esawu, hikuva ndza n'wi chava, a nga ta ta a ta ndzi ba, a dlaya vana ni mana wa vona.

¹² Hikuva wena u te: ‘Hakunene ndzi ta ku katekisa, ndzi endla leswaku vatukulu va wena va kotisa sava ra lwandle, leri nga hlayekiki hi ku tala ka rona.’ ”

¹³ Yakobo a xwa kona vusiku byebyo; kutani a hlawula exikarhi ka leswi ngi a ri na swona emavokweni, a ta rhumela Esawu nhlengo,

¹⁴ ti ri timbuti ta madzana mambirhi, ni makume mambirhi ya swiphongo, ni madzana mambirhi ya tinyimpfu, ni makume mambirhi ya makhuna,

¹⁵ ni makume manharhu ya tikamela leti an'wisaka ni swikamelana swa tona, ni tihomu ta matswele ta mune wa makume, ni tinkunzi ta khume; ni timbhongolo ta matswele ta makume mambirhi, ni leta xinuna ta khume.

¹⁶ A swi veka emavokweni ya malandza ya yena, ntlhambi wun'wana ni wun'wana ha tlhelo, a ku eka malandza ya yena: “Ndzi rhangeleni emahlweni, mi siya mpfhuka exikarhi ka ntlhambi wun'wana ni wun'wana.”

¹⁷ Kutani a lerisa lowo rhanga, a ku: “Kutakuloko hosi ya mina Esawu a hlangana na wena, a ku vutisa, a ku: ‘U wa mani? U ya kwihi? Leswi nga emahlweni ka wena, i swa mani?’

¹⁸ mi ta ku: ‘I swa nandza wa wena Yakobo; i nhlengo lowu a wu rhumelaka hosi yanga Esawu; kambe na yena hi loyi, a taka endzhaku ka hina.’ ”

¹⁹ A lerisisa sweswo lowa vumbirhi, ni lowa vunharhu, ni hinkwavo lava landzelaka mitlhambi, a ku eka vona: “Mi ta vulavula sweswo loko mi hlangana na Esawu,

²⁰ mi ku eka yena: ‘Waswivo, nandza wa wena, Yakobo, wa ta na yena endzhaku ka hina.’ ” Hikuva a ku: “Ndzi ta rhulisa mbilu ya yena hi nhlengo lowu ndzi rhangelaka emahlweni, ndzhaku ndzi ta tiva ku vonana na yena;

²¹ kumbe xana a nga ndzi amukela.” Kavaloko nhlengo wu rhangela emahlweni ka yena, kambe yena a xwa enxaxeni hi vusiku byebyo.

²² Kutani a pfuka vusiku byebyo, a teka vasati va yena lavambirhi, ni malandza ya yena lamambirhi, ni vana va yena va khume na un'we, a pela hlaluko ra Yaboko.

²³ Kutani a va teka, a va perisa nambu, a perisa ni leswi ngi a ri na swona.

Ta ku lwa ka Yakobo na Xikwembu.

²⁴ Yakobo a sala a le swakwe; kutani munhu a lwa na yena, a kamana na yena byi ko byi xa.

²⁵ Kuteloko a vonile leswaku a a tsandzeka ku n'wi hlula, a ba nyonga ya Yakobo, nyonga ya Yakobo yi suleka loko va ri karhi va kamana.

²⁶ Kutani yeloyi a ku: “Ndzi tshike ndzi famba, hikuva byi lava ku xa.” Kambe Yakobo a ku: “Ndzi nga ka ndzi nga ku tshiki u famba, u nga si ndzi katekisa.”

²⁷ Loyi a ku eka yena: “Vito ra wena u mani?” Yena a ku: “Yakobo.”

²⁸ Loyi a ku: “Vito ra ku a ri nga ha vuriwi Yakobo, kambe u ta va Israele (la hluleke Xikwembu); hikuva u kamane na Xikwembu, u lwile ni vanhu, kutani u va hlurile.”

²⁹ Yakobo a n'wi vutisa, a ku: “Ndzi byele vito ra wena”; kambe loyi a ku: “U ndzi vutisela yini vito ra mina?” Kutani a n'wi katekisa kona.

³⁰ Yakobo a thya xivandla xexo vito ra Penuwele (mombo wa Xikwembu); hikuva a a ku: “Ndzi vone Xikwembu emombyeni, kambe vutomi bya mina byi hlayisekile.”

³¹ Kutani dyambu ri n'wi tsuvukela loko a ri karhi a khaluta Penuwele; kambe a khwita hi nyonga.

³² Hikwalaho, ninamuntlha, vana va Israele a va dyi nsiha wa nyonga lowu nga enyenyeni, hikuva Yakobo a khumbiwile ensiheni wa nyonga.